الفصل السابع
الدكتور جاي ينظر إلى سلطان وقال :Congratulations Mister Sultan, the operation was successful
فيكرام: الدكتور يقول لك أن العملية نجحت
سلطان بكل سعاده : اللهم لك الحمد والشكر الحمدلله .
وفي بيت الجده صبيحه يرن الهاتف ترد عايشه على الاتصال: ألو
سلطان : أهلا بنتي عايشه
عايشه: أبويه طمني على أمي كيف العمليه؟
سلطان : الحمد لله نجحت العمليه وبعد شوي بيطلعوها من غرفة العمليات
عايشه : اللهم لك الحمد أريد اكلم أمي
سلطان : أمك بعدها تحت تأثير البنج اتصلت عشان أطمئنكم اتصلت على البيت محد رد علي واتصلت على بيت جدتكم عشان اطمئنكم .
جات الجده ومسكت سماعة التلفون:هلا يا سلطان طمني على بنتي رقيه .
سلطان : الحمدالله أبشرك يا عمه العمليه نجحت وطمني الكل
الجده صبيحه: اللهم لك الحمد والشكر اشكرك يارب .
سلطان : يالله أنا بخليكم وبعدين باتصل
يغلق سلطان الخط والجده وأحفادها يحمدون الله على سلامة رقية .
وفي الفندق رقية ترتاح بسريرها
سلطان: كيف تحسي نفسك الآن في مضاعفات أو ألم؟
رقية: شي ألم بسيط مع أدوية المسكنات راح أطيب .
سلطان: الحمدلله كنت حاب تجلسي معاهم يومين بالمستشفى لحد ماأطمئن عليك بس هم أصروا على خروجك وقالوا الأمور طيبه .
رقيه: الحمد لله أنا بخير وماله داعي هاليومين اللي اجلسها بالمستشفى .
سلطان : ترتاحي هنا بالفندق هاليومين .
رقيه: لا ماله داعي خلينا نرجع البلاد باكر .
سلطان : أنتِ عاملة عملية كانت صعبة ولازم ترتاحي .
رقيه: أرتاح أكثر عندما أكون في
منزلي وسط أعيالي وأهلي الله يخليك .
سلطان : أخ منك بس تمام بس الآن لازم تنامي وترتاحي وتاخذي فترة نوم كافي عشان باكر ما تتعبي علي بالطيارة .
رقيه: ان شاء الله الغالي
وفي مساء اليوم الثاني تحركت الطياره من الهند إلى مطار مسقط ويستقبل محمد وحسن أهله بالمطار وفي السياره
سلطان : وين إخوانك ؟
محمد : خليناهم بالبيت عشان ما يضايقون أمي بالسياره وهي عاملة عملية.
سلطان : زين سويت
رقيه: حرام كسرت خاطرهم كان جبتهم معاك ماعلي غير العافيه
حسن : ماراح نطول حلوت اللبن كلها ساعه بالكثير وبنكون بالبيت وبتشوفيهم .
وبعد مرور الوقت وصلوا البيت ونزلوا والبنات يحضنوا أمهم ودموع الفرح والسرور بعينهن ودخلت رقيه غرفتها ترتاح بسريرها وجلست جنبها شمعه .
مريم : بهاي المناسبه أنا مسويه العشاء
رقيه: ما شاء الله وطلعنا نعرف نطبخ .
عايشه: ماعليج منها غيياره تعرف تطبخ بس تدلع عليك .
رقية: اذا كده كنت بسافر من زمان عشان تطلع مواهبكم .
مريم: تحضن أمها : لا لا ماتحمل بعادك عنا هالاسبوع مر علينا كأنه شهر .
رقيه : حبايبي والله اشتقتلكم
شمعه: وأنا بعد اشتقتلج .
رقيه:وأنا بعد يا آخر العنقود لج وحشه كبيره .
صوت جرس باب البيت يطلع محمد يفتح الباب يحصل جدته وخالته عند الباب يدخلن غرفة رقيه ويتحمدن بالسلامه لرقيه وسلطان ومن بعدها حطوا العشا وتعشا الجميع .
وفي اليوم الثاني من بعد صلاة العصر الزوار من حريم الحاره ماتنقطع داخل وطالع يحمدوا بالسلامه لرقيه ويطمئنوا عليها وعايشه ومريم ومع خالاتهن يقمن بواجب الضيافه .
يتبع….
