الكاتب :سمير الشحيمى
المزرعه
الساعه الآن 10 صباحا؛ الجميع مجتمعين للإفطار إلا مزن سأل عنها مصعب : وين مزن ماشوفها جات؟
حياة: نايمه تعرف سهرانين طول الليل.
مصعب: إيه أعرف بس متعود على نشت الصبح الساعه ١٠ أيام الإجازه وأحب أشوف الكل موجود.
أصيله : ما مشكله مصعب مافيها شي خليها نايمه.
مصعب : الأمور طيبه؛ صحيح اليوم بيجي فارس وزوجته يتغدون معانا هنا بالمزرعه.
أصيله : يعني طلعه عائليه عشان شو يجي فارس وزوجته.
مصعب : أصيله هذا فارس أخو دنيا وما أستغني عنه وأنتي عارفه هالشي على العموم حسبي حسابك وخبري الخدامه تجهز الغدا وأبيك أنتي والبنات تشرفون على كل صغيره وكبيره في هاي العزيمه.
سندس وتماضر وضحى : إن شاء الله عمي.
أحمد: أنا ما أقدر أحضر معاكم على الغدا لازم اكون بالمكتب مع موكليني.
مصعب: أها؛ كان ودي تشاركنا ولكن يالله المره الجايه.
أصيله: حاول تترخص منهم.
أحمد: ياليت أقدر صاحب المكتب ماموجود مسافر ولازم حد يتلاقى مع الموكلين عشان محكمة الأحد.
مصعب : ماعليه خيرها بغيرها بنعوضها حقه الأيام الجايه؛ يالله شدو الهمه وأبدئوا بتحهيزات العزيمه وأي شي ناقصكم خبرو السايق يجيبه من السوق وأنت يا ولدي يا نايف خبر العامل يطلع الخروف الأسترالي من الحضيره يذبحه ويسلخه ويقطعه ويجهزه لطباخ.
نايف: إن شاء الله عمي.
مصعب: عاشو أعيالي ضبطوا أموركم وأنا بطلع بشغله بسيطه حوالين محضه.
أصيله: أجي معاك عيل.
مصعب: من راح يشرف على أكل العزيمه؟
أصيله: البنات موجودات ماعليهن خوف.
مصعب: لالا خليك أنا ما أطمن إلا أنتي معاهم وتشرفين على كل شي باخذ معاي حياة.
أصيله: ماتبي تاخذني أوك ماعليه ليش عاد تبي حياة وياك خليها أبيها تساعدني.
مصعب: لا يكفن معاج البنات ماراح يقصرن وصحي بنتك مزن تنزل تعاونكم وحياة أبيها معاي بشغل خاص فيها؛ يالله حياة قومي نطلع.
حياة:إن شاء الله أبوي مصعب.
أصيله تناظر حياة بكره وحقد؛ وطلع مصعب يسوق السياره وحياة جنبه بجوله في محضه ومناطقها الجبليه الجميله قالت حياة: على وين سايرين؟
مصعب: ناخذ لفه على ربوع محضه وفي شي أبيك تشوفيه.
حياة : شو هو اللي تبيني أشوفه؟
مصعب : اللحين بتشوفينه بس يكون سر بيني وبينج.
حياة: تمام ولا يهمك.
وفي الشاليه أصيله بالمطبخ مع البنات وهيه متنرفزه: بس أموت وأعرف شو يبي فيها شالنها معاه أخ يالقهر.
سندس: هاي حياة شكله عمي مصعب وايد يحبها ومتعلق فيها.
أصيله: حبها برص شو يحب فيها هاي اللي ماينعرف من هم أهلها ولا شو أصلها.
تماضر: صلوا على النبي ياجماعه ترا البنت يتيمه وعلى نياتها مب زين.
ضحى : وهيه صادقه تماضر ترا البنت حليلها ما شفنا منها إلا كل خير وهيه متربيه معانا من نعومة أضافرها.
أصيله:اسكتي أنتي وياها شو عرفكم أنتوا اونه على نياتها أنا من أول يوم جابها البيت وهيه بقماط بين إيده وأنا قلبي مارتاح لها أبد ولا حبيتها.
يدخل نايف وأخوه للمطبخ وقال نايف: خلاص العامل ذبح وجهز لحم الخروف وحاليا بالقدر يطبخ.
أصيله : الله يعطيكم العافيه ياعيالي.
دخلت مزن المطبخ وهيه تتثاوب توها ناشه من رقاد: ما شاء الله الكل مجتمع بالمطبخ.
أصيله: بس وعيتي شبعتي رقاد روحي جهزي نفسج عدنا ضيوف على الغدا.
مزن: من هذيلا الضيوف؟
أصيله:عمك فارس وزوجته المصون.
مزن :أنا جوعانه أريد اتريق.
أصيله : أي ريوق الساعه 12:30 الظهر روحي سبحي وجهزي نفسك وبتتغدي مره وحده.
مزن بدلع:حرام والله جوعانه.
أصيله : بالطاوله فيها سلة فواكه أكلي أي شي وروحي جهزي نفسك ولا تمرضيني زياده.
راحت مزن بعد ما خذت تفاحه وبرتقاله وشوي سياره تدخل المزرعه كانت سيارة مصعب ومعاه حياة قبل عن ينزل مصعب من السياره قال: سمعي بنتي حياة اللي شفتيه اليوم هذا سر بيني وبينك محد يعرف عنه وبعد في شي ثاني باكر بتعرفي عنه.
حياة: شكله اليوم وبكره كله مفاجآت.
مصعب: أنا أسوي أي شي عشان تكوني سعيده.
حياة : مشكور أبوي مصعب.
ونزلوا من السياره وشوي صوت هرن وصل فارس وزوجته وداد؛ نزل فارس وزوجته واستقبله مصعب بالأحضان وهو يقول: يا هلا ومرحبا ياهلا فارس نورت المزرعه
فارس : هلا بيك مصعب ود العم النور نورك ماعليك زود.
مصعب : طمني عليك كيفك وكيف صحتك؟
فارس : أنا بخير لله الحمد بس عسى ما تأخرتنا عليكم؟
مصعب: لا بالعكس على الوقت تمام هلا بيك وداد حياك الله أم فهد.
وداد : الله يحييك ويبقيك أخوي مصعب.
حياة : هلا عمي فارس وعمتي وداد كيفكم أن شاء الله بخير؟
فارس : هلا ببنتي حياة أنا بخير دامج بخير.
وداد: هلا بعروستنا الحلوه ما شاء الله عليج تكبري وتحلي
حياة بخجل : تسلمين عمتي.
مصعب : يالله حياة خذي عمتك داخل ونحن بنسير المجلس وإذا جهز الغدا خليهم يحطونه على طول.
وراحت وداد وحياة داخل البيت ولتقن الحريم مع بعض؛ أما مصعب وفارس بالمجلس ودخل عليهم نايف وحيدر وسلموا على عمهم فارس وصبو له القهوه؛ قال مصعب: تعرف يا فارس لك وحشه ياخوي نتلاقى بالبريمي مرور الكرام.
فارس : وأنت بعد لك وحشه انزين اجتمعنا مع بعض اليوم نتلاقى مرور الكرام بسبب كثر الأشغال والاجتماعات.
مصعب : هيه نعم صدقت.
فارس: كيف وضعك طمني كيف الأعمال معاك؟
مصعب: الحمدالله في تحسن وأحسن من قبل من بعد أزمة كورونا انتعش السوق.
فارس: زين زين كيف حياه وكيف أمورها مع زوجتك أصيله وأعيالها؟
مصعب: والله شو أقولك ماشيه الأمور الحمدالله بعدني مسيطر.
فارس : بعدك دير بالك لأن مصير الأمور تصير سيئه فجأه من دون سابق إنذار ولا تقرب الزيت على النار ترا مصيبه.
مصعب : لا تحاتي بالوقت المناسب بخلص كل شي بس أنت همتك معاي.
فارس: لا تحاتي ياخوي أنت تعرف أن أنا من إيدك هاي لإيدك هاي.
مصعب : أدري أنك كفو أخو دنيا.
دخل نايف وهو يقول : تفضلوا عمومتي الغدا جاهز.
يتبع…
