سمير الشحيمى
فيلا مصعب
تماضر تدخل على الممرضه بعد سماع صوت صرختها لقت الممرضه واقعه على الأرض سألتها: سلامات شوفيك؟
الممرضه: شفت شي فزعني عشان كذيه صرخت.
تماضر: شو هالشي اللي شفتيه؟
الممرضه تأشر بيدها على شي جالس بجانب الدريشه كانت قطه.
تماضر : هاي قطة الجيران تعبتنا من كثر ما تحوس ادور بس باب أو دريشه تنفتح عشان تدخل البيت.
طلعت تماضر القطه برا وصكرت الدريشه عنها وقالت الممرضه : سببتلي صدمه بلا وعي صرخة أنا آسفه.
تماضر : لا عادي كيف صحة عمي مصعب؟
الممرضه: مثل ماهيه حالته ولكن لا تفقدو الأمل بيقوم إن شاء الله.
تماضر : إن شاء الله اشتقناله.
طلعت تماضر من الغرفه وتوجهت الممرضه لدريشه وفتحتها ودخلت القطه مره ثانيه وجلست بحضن الممرضه وهيه تبتسم وتقول : قطتي المدلله وجودك أنقذ الموقف بلحضه الاخيره ولا كنت راح أنفضح.
الجامعه
مزن مع أفنان واقفات مع أحد الدكاتره اللي يدرسونهم بالجامعه بعدها راح الدكتور قالت أفنان : أشوف حياة جايه اليوم بسيارتها كنه أمك رضت عليها ولا شو السالفه؟
مزن : ولا عارفه أي شي صايره أمي هالفتره غامضه بشو تفكر ولا شو تبي ما أعرف.
أفنان: ما قلتي حقها إنج تبي تغيري سيارتج؟
مزن : خبرتها قالت لي صبري مب اللحينه.
أفنان: صح كيف متى بنسير الشاليه مالكم بمحضه أنتي واعدتني.
مزن : شو رايج هالويكند أنسير الشاليه ونعزم كم وحده من صديقاتنا.
أفنان: حلو وناسه أوك بخبر الشله.
حياة وميره طالعات من قاعة المحاضرات تقول ميره: اليوم الغدا على حسابك عشان رجعت السياره لك بالسلامه.
حياه: حتى هاي بعد تبيله مناسبه تحتفلين فيها.
ميره: أي شي يكون حدث مهم لازم يكون في عزيمه.
حياة: بس تم من بعد الجامعه أختاري المطعم اللي تبينه وبنسير نتغدا فيه.
ميره: ندش العين نسير العين مول الطابق الأرضي فيه مطعم خرافي فخاطري أكل فيه.
حياة : العين عاد مطاعم البريمي شوفيها.
ميره: اقول لها مطعم خرافي بخاطري أكل منه وهيه تقولي مطاعم البريمي حمدي ربك ما قلت حقج دبي.
حياه : لا أبويه خلاص العين العين أرحم ولا روحت دبي عنيده.
ميره:هيه نعم لو نتحرك بعد شوي أفضل ماشي عدنا محاضرات عشان نسير ونرجع قبل أذان العشاء.
حياه: شور طيب يالله رحنا.
فيلا مصعب
الساعه 9 مسآء أصيله تدخل الفيلا بعد عودتها من الشاليه الكل جالس بالصاله سلمت عليهم؛ أول مكان راحت له غرفة مصعب الطبيه لقت الممرضه بالغرفه دخلت وصكرة الباب وراها وقالت :قريت رسالتك وكل شي تمام التمام بس نص المبلغ وااايد.
الممرضه: لا تنسي أن أنا راح أخاطر بمهنتي ومصدر رزقي عشانك
أصيله تضحك: هههه؛ مب عشاني قولي عشانك أو عشان ولدك هشام المريض.
الممرضه: أنتي شو عرفك عن ولدي؟
أصيله : كل شي أعرفه ولا أنا مجنونه أعطيك مهمه نفس هذي وأنا ما أعرف أي شي عنك.
الممرضه : على العموم نصف المبلغ والباقي بعد جنازة المرحوم مصعب.
أصيله : وشو يضمن لي أنك ماراح تغدري فيني لما تاخذي نصف المبلغ لأن المبلغ كبير يمكن تبيعيني بلحظه.
الممرضه: الضمان ضحكتيني أم نايف هاي الشغله مافيها ضمانات نفس ما انتي ما واثقه فيني حتى أنا ما واثقه فيج.
أصيله: أها تمام نصف المبلغ والعمليه تصير جدام عيني.
الممرضه :وأنا حاضره بلي تبيه.
أصيله : اتفقنى
الممرضه : كيف بخصوص حياة.
أصيله: لا تحاتي بخصوص موضوعها الأمور طيبه.
الممرضه :كيف يعني؟
أصيله :عليك بمهمتك وخلي حياة علي.
بيت ضحى
الساعه 12 صباحا يرن تلفون أحمد إنه اتصال من زوجته ضحى.
ضحى: هلا أحمد كيفك وكيف الصغاريه؟
أحمد : الحمدلله كله تمام.
ضحى: الحمدلله؛آسفه ماجيت بدري البيت صار عدنا حالات وصلت المستشفى بقسم الطواريء تسمم من أكل المطاعم.
أحمد : الله يشفيهم يارب مب مشكله حبيبتي لا تحاتي خليك بشغلك وأنا موجود مع الاعيال.
ضحى: تسلم حبيبي إذا في شي تواصل معاي.
أحمد : ولا يهمك وانتي بعد ديري بالك على نفسك.
أغلق الخط وصله مسج غريب من شخص يعرفه عز المعرفه ولكن يرسل مسج بهذا الوقت هيه اللي خلت أحمد يستغرب.
يتبع…
