المهدي تركي الرياحي
السعودية – جدة
صباح الخير ياوجهٍ ذكرته لكن مدري وين
دخيلك بلغه مني سلامي ياهواء الاصباح
بوجهك يا الصباح اسعدت فينا كل قلب وعين
لنا عبرة من صوات الطيور بحزة المسراح
انا اعشق لي صباحٍ مثل نورك منتظره سنين
حفظت اسمه لاجل قدره كبير ويصعب الافصاح
بقى فالذاكرة وحداثها مادامنا حيين
من اللي صار فيها من عذاب وكامن الاجراح
اطفالٍ كلنا نبني نماذج من بيوت الطين
ونرسم بالورق سيرة على الجدران و الالواح
ذكرت اول رسالة منه سهمٍ يخترق قلبين
وكتب تحته حروفٍ ما تفوت العاشق اللماح
يذوب الشمع من همسة فراقٍ صار بين اثنين
وتذوب قلوب في لحظة وداع وتذبل الارواح
حسبت انه ما يحصل بيننا لوعة فراق وبين
وحسبت ان الزمن كله ليالي مقمره وافراح
انا هنا اعترف واشهد شهادة يالزمان الشين
خسرت الغالي اللي مايردة مكسب الارباح
ذخرته ما مضى لكن ما زلت اذخره ذلحين
ماعمره مرني يومً وقدره من عيوني طاح
تحريته يقول ادخل بساتين العنب والتين
وانا ما ابغى من البستان غير التوت والتفاح
لكنه ماحصل لي منه لا وحده والا ثنتين
على شان الحياء يرد من يعشق بدون سلاح
وانا ماعاد افرق يا زماني فالشقاء واللين
مثل ما رتاح بك فاللين انا بك فالشقاء مرتاح
✍️ المهدي تركي الرياحي
