المهدي تركي الرياحي
السعودية – جدة
البارح انا من مسافاتي تحدرت السيول
كل الشجر فالاودية معها غصونه مايحه
لاعلها لا وصلت الارض النظيفة والسهول
تنبت زهورٍ عطرها يعطي جميل الرايحه
واقول للي في قرارته يصدرها عجول
اركد وطالع فالنتائج لو تصيح الصايحه
واللي يقول بلا دليل الناس تفهم ويش يقول
لو يسكتون اقدورهم من الغباين فايحه
المشكله فالرؤس لاقامت تدبرها الرجول
اليا تغدوا زبدةٍ فوق الشوارب سايحه
ما ضيع اصحاب العقول الا قليلين العقول
يكثرهم في ذا الزمن متصدرين اللايحه
كم واحد يسوقه الشيطان واغتزه ذلول
يشوف نفسه رايحٍ واعلومه اللي رايحه
وحفلة مجالسهم رقص فيها منافق ومهبول
واللي كرامتهم من سنين تعدت بايحه
حتى الرجال اللي يعرفون الكياسة والاصول
صاروا مثل باقي الشعوب اللي وطتها الجايحه
ياراعي حصان تكده وابعدت عنك الخيول
ان مت ماتلقى لك حدٍ غير أمك نايحه
اللي دعاني يوم اقوله ليس من باب الفضول
لكني اكره مدح خبلٍ كثروا مدايحه
ماضيّق الساحات غير اهل الكلام بلا فعول
في كل يوم تشوف لك وجهٍ جديد وتايحه
اخترت حلٍ فيه راحة لي عن باقي الحلول
بعدي عن اللي ينصح والا يحترم نصايحه
لو ان وجهي من مواجيب الرجاجيل مغسول
انكان ماسلّم على اصحاب الحظوظ الطايحه
✍️ المهدي تركي الرياحي
