عازف الناي

السعودية – جدة
ياعازف الناي لا تعزف تزيد القهر
ماتدري انك بصوت الناي تشقي قلوب
عزفك شجيٍ تخاوى مع نسيم الفجر
والعزف الاخر حزينٍ قبل وقت الغروب
ونة طريح الهوى يذوب منها الصخر
حتى دموعه تسوي فالمحاجر ندوب
الحب راعية دايم تحت سيف الخطر
حتى لو انه هلاكة فالهوى ما يتوب
المشكلة في دموعٍ زرق وامست حمر
في كل يوم على خد المولع سكوب
وكم شاعرٍ من معاناته كتب له سطر
وعجز يعبر عن الباقي ببيت محسوب
والحب روحٍ تنفس فيه حتى الشجر
ما تنشد الورد ليه الطل فوقه يذوب
حتى النخل لا حبست الماء عطش و انتحر
ويبست جذوعه وكنه ساجدٍ من ذنوب
شوف كيف حب الصحاري يوم تبغى المطر
لاروى عطشها تشوف العشب في كل صوب
وشوف كيف مجرى النهر يعشق مصب النهر
لو سد مجراه فاض وحط لاجله دروب
وشوف عاد وش كثر حبٍ في قلوب البشر
اللي يجمع شعوب وتفترق به شعوب
✍️ المهدي بن تركي الرياحي