المهدي تركي الرياحي
السعودية – جدة
الله انه لايعيد الشعر وجنان الشعاره
كل يومٍ كأني الشحاذ ادور معجبيني
قمت أدوج ادور الجمهور من حاره لحاره
و القصيد اسرق من الحيين واللي ميتيني
صرت اقول الشعر واقنص مثل قناص الوباره
نوب اسوي به عصيد ونوب اسوي به حنيني
وليتني اقدر على جمع الشعاره والاماره
واعزم اصحابي على حفلة واجيب مصوريني
ونفسي اعشق ريمه وليلى وقلبي عند ساره
وادعي بالحب لو مامنه عندي حبتيني
مير هاذي روحت مع درب هاذي ياخساره
ما بقى غير الونيت وخوة المتقاعديني
الشعاره كيفها فكر وثقافة مع شطاره
مع خيال واسع يملي على قلبٍ فطيني
والاماره مطلعٍ صعبً طويل لراس قاره
ماهي للي كل مجلس حافظٍ له كلمتيني
والمحبة شئ فطري ما يجي بالاستعاره
لا يغرك نصف عشاق التواصل كاذبيني
✍️ المهدي تركي الرياحي
