سمير الشحيمى _عمان
منزل صقر
سلمى والعنقاء وجراح صاحيين بدري ويتناولون وجبة الإفطار رن هاتف سلمى اتصال من صقر : صباح الخير.
سلمى : صباح الخيرات والمسرات.
صقر : كيف اصبحتوا؟
سلمى : الحمدلله بخير انت كيفك؟
صقر : بخير لله الحمد ها شو جالسه تسوي؟
سلمى: ولا شي جالسه آكل مع الصغاريه عنقاء وجراح.
صقر : والبقيه؟
سلمى : تعرف إجازة نايمين ماراح يقومون إلا قريب الظهر.
صقر : هيه نعم قريب يخلصون وتصير اجازه معاهم رقاد بنهار وسهر بليل.
سلمى : هذا هو الحال.
صقر : أنا بس حبيت اقولك راح اكون معاكم على الغدا بخاطري مجبوس دجاج من يدك الحلوه.
سلمى : من عيوني ولا يهمك توصل بالسلامه.
فجأه صوت إحدى أبناء رحمه وهو يلعب.
سلمى : صوت ياهل اسمع عندك؟
صقر برتباك ويغير مكانه ويطلع على البلكونه: تعرفي انتي فندق وعوائل لازم صوت أطفالهم بتسمعينه.
سلمى : اها زين زين خلاص عيل بننتظرك توصل بالسلامه.
صقر : الله يسلمك.
يغلق الخط.
سلمى تكمل أكلها مع عنقاء وجراح.
منزل رحمه
صقر جهز أغراضه ولبس دشداشته قالت رحمه : تعال تريق.
صقر يجلس على طاولة الطعام وقال : صوت ولدك بدر سمعته سلمى بس زين لحقت على الموضوع.
رحمه : ما اعرف شو اقولك يا صقر.
صقر : قولي اللي بخاطرك.
رحمه : ماريد اعيد وازيد بكلام نحن منتهين منه بس لازم تشوف حل لموضوعنا مثل ما خبرك أبوي.
صقر : صعبه افاتح سلمى بهالموضوع تخيلي اقول لها متزوج وعندها أعيال مب أعيالي.
رحمه : صقر أعيالي بدر وحور وفهد من بداية من تزوجنا وقلت حقك ما أقدر أتخلى عنهم واعطيهم لأبوهم وأنت وافقت.
صقر : عارف رحمه بس أبيك تعطيني شوية وقت ممكن؟.
رحمه : تمام خذ الوقت اللي تبيه.
صقر : ممكن ناكل بدل الضيقه على أول الصبح.
رحمه : آسفه عليك بالف عافيه.
منزل أحمد ( العاصمة)
أحمد جالس بمكتبه يقلب بعض الأوراق ودخلت عليه زينب ومعها صينية قهوة الصباح ووضعتها امام أحمد وقال لها : ليش تعبتي نفسك كان الخدامه راح تجيبه موصنها.
زينب : عادي مافيها شي وعلى فكرة أنا مسوتنها حقك القهوة مثل ماتحبها.
أحمد: تسلم إيدك.
زينب : الله يسلمك.
أحمد تناول فنجان القهوة ورشف منها رشفة وهو يناظر زينب ثم قال : بخاطرك كلام ودك تقوليه.
زينب : لا من قال ولا شي.
أحمد : عيونك فاضحتنك قولي شو بخاطرك.
زينب : والله أنت تعرف ما أحب أدخل ولا أسئلك عن أي شي أنت تسويه بس أنا أحاتي بنتي رحمه ووضعها.
أحمد: أدري وأنا نفسك بس هذا اختيارها هيه.
زينب : بس الموضوع كمل سنه.
أحمد : عشان كذيه أنا كنت جايبنه هنيه عشان ينهي هالموضوع.
زينب : وشو رد عليك؟
أحمد: يبي شوية وقت والموضوع اللحين معاه ومع بنتك رحمه.
زينب تبادله نظرات.
منزل صقر
غرفة صقر وهو يبدل ملابسه صوت طرق على الباب دخلت بنته شيهانه.
صقر : هلا شيهانه كيف الحال تعالي.
شيهانه: بخير حمدالله على السلامه.
صقر : الله يسلمك كيف الكلية معاك؟
شيهانه : زينه باقي كم يوم وبعدين إجازة.
صقر : زين زين بالتوفيق يارب.
شيهانه : حبيت أسألك متى راح نتحرك صوب صلاله؟
صقر يضحك : مستعيله؟
شيهانه : اكيد وناسه.
صقر : قريب إن شاء الله خلال هالايام.
شيهانه : أبوي حبيت اقولك شي ثاني.
صقر : هاتي ماعندك.
شيهانه: بغيت فلوس اريد اشتري كم شغله ناقصتني.
صقر : ولا يهمك اليوم العصر بعطيك بطاقة البنك وروحي خذي اللي ناقصك بس ها شوي شوي على الصرف.
شيهانه: مشكور أبويه من عيوني ننتظرك على الغدا.
صقر : تمام جاي.
اقراء أيضا: عائلة صقر الفصل السادس عشر
يتبع…
