سمير الشحيمى _عمان
الكلية
شيهانه ونادره في القاعه والكل متواجد ينتظرون الماستر يدخل عليهم.
شيهانه : أخيراً اليوم وبعدها إجازة.
نادره : هيه نعم من ريح راسنا من الدراسه شوي.
شيهانه: اكيد وبعدها إلى صلاله.
نادره : وناسه راح نتلاقى هناك.
شيهانه : تعرفي شكثر متحمسه البارحه أبوي عطاني بطاقة البنك وخذيت الشغلات اللي ناقصتني بس باقي آخذ كم بدلة شفتهن بموقع طالعي . وسعرهن مناسب شو رأيك انطقم مع بعض؟
نادره تنظر لهاتف شيهانه : حلو خلاص احجزي حقي وحقك.
شيهانه : بس تم.
نادره : متى راح تتحركون بالضبط؟
شيهانه : ماعرف بس أبوي قال قريب.
نادره : نحن الاسبوع الجاي بنطلع بطياره حاجزين تذاكر خلاص.
شيهانه : حظك والله فخاطري اركب طياره نحن بنطلع عن طريق البر.
نادره : أهم شي توصلي هناك.
دخل الماستر الكل يصمت وانتباه له.
المؤسسة
مكتب صقر وهو مندمج بالعمل وزميله سعيد يقلب صفحات بعض الملفات وقال : صقر شفت آخر ملف كان مطرشنه المدير دورت عليه ماحصلته.
صقر : بتحصله تحت ثالث درج على اليمين.
سعيد يخرج الملف : المدير مستعجل على هالملف لازم اخلصه.
صقر : شد حيلك.
سعيد : رحت اطلب إجازة قالي المدير انك مقدم على إجازة.
صقر : هيه والله.
سعيد : على وين؟
صقر : على صلاله أنا والعيال.
سعيد : زين زين.
صقر : وين تبي تروح صلاله؟
سعيد : مخطط مع المدام والعيال نسير هاي السنه البوسنه.
صقر : وايد حلو بصراحه.
سعيد : راح اضبط المدير بخليه يجيب حد انتداب مكاني.
صقر : أنت تقدر عليه ضبطه.
سعيد : أكيد.
منزل أحمد (العاصمة)
زينب تخرج من المطبخ وتجد أحمد جالس بالصاله يتابع التلفزيون وسألها : شو تسوي بالمطبخ؟
زينب تجلس : كالعادة أخبر الخدامه عن الغدا وشو تسوي لازم أشرف عليها.
أحمد: الله يعطيك العافيه.
زينب : الله يعافيك.
أحمد : خليك جاهزه اليوم المغرب.
زينب : ليش؟
أحمد: بنسير بيت أبو فارس نتحمدلله بالسلامه.
زينب : ما شاء الله رجع من رحلت العلاج؟
أحمد: أيوه لله الحمد بنسير نطمن عليه.
زينب : أن شاء الله.
المؤسسه (العاصمة)
رحمه بمكتبها تخلص بعض المعاملات صوت طرق على الباب يدخل الفراش ومعاه صينية الشاي وبسكويت يخرج الفراش تتناول رحمه كوب الشاي وقطعه من البسكويت ثم مسكت هاتفها واجرت مكالمة لصقر يرد عليها: هلا صقر شحالك.
صقر : هلا وغلا بخير أنتي شحالك.
رحمه : الحمدلله شو جالس تسوي.
صقر : بالعمل كالعادة وأنتي؟
رحمه : أنا كذالك بالعمل ماباقي شي ويخلص الدوام واشرب شاي وأكل بسكويت.
صقر : حتى أنا أريد بسكويت.
رحمه : تعال أنت وبدل البسكويت كرتون بسكويت.
صقر يضحك : ماتقصري.
رحمه : كنت أخطط لو نسافر مكان هالصيف شو رايك؟
صقر : والله كان زين بس الأعيال وأمهم يبغون يروحون صلاله.
رحمه : أها ، يعني اسافر بروحي مع الصغاريه؟
صقر : وين حاطه ببالك تسافري؟
رحمه : تركيا.
صقر : والله فكره حلوه بس للأسف واعدهم اوديهم صلاله.
رحمه : ماعليه مره ثانيه.
صقر : لا تزعلي.
رحمه : لالا ليش أزعل الأمور طيبه المهم بخليك.
صقر : ديري بالك على نفسك.
رحمه تغلق الخط وهيه حزينه.
الكلية
شاهين وباشق ومنير بالكافيه داخل الكلية يشربون القهوة ويتحدثون.
باشق : هاي آخر لمه وياكم بفتقدكم.
منير : ربي يوفقك وتحصل الوظيفه المناسبه.
باشق : الله يسمع منك بس قبل أفكر أسافر شهر زمان حتى لو لفه على دول الخليج تغيير جو.
شاهين: بدينا حق السربته.
يضحك منير وباشق من كلامه.
اقراء أيضا: عائلة صقر… الفصل السابع عشر
يتبع….
