عاميه مصريه نصيحة أم
مصر
ابني يا راجل البيت من بعد وفاة أبوك
تعال هاقولك كلمتين
أبوك كان راجل جدع ومالي هدومه
عمره ما عمل الغلط ولا فكر فيه من يومه
عاش راجل وحطنا جوا قلبه و عيونه
أبوك يا ابني كان بيسعى على الرزق الحلال
يجمعه ويصونه
لا عمره قال تعبت أو مليت وعرقه كان
دايما مغرق جبينه و هدومه
اسمعني يا ابني لازم تكون طالع لأبوك
في اخلاقه وكل شؤونه
اياك في يوم تصاحب قليل الأصل
او تعاتبه ولا تلومه
لا تماشي الندل ولا تقعد معاه ولا تبص
…. كمان في عيونه
اسمعني يا ابني انا مش عايشالك
خلاص انا كبرت وعايزاك تشوف حالك
عايزه أفرح بيك واشيل بناتك وعيالك
خلي بالك من اللي منك وما تحرمهم حنيتك
و زيارتك وسؤالك
فاهم كلامي أنا عايزه اموت
وانا راضيه عنك وداعيالك
خليك لكل اخواتك أب واعتبرهم
خلفتك و عيالك
عايزه يا ابني قبل ما اموت اشوف
بنفسي تصرفاتك وأفعالك
اسمع كلامي يا ابني وكلام عمك
وكمان خالك
ربنا يبارك في عمرك وصحتك ويعلي مقدارك
بقلمي محمد عبدالحميد السيد
جمهورية مصرالعربية
