مصر
أيوة في فرق مابيني وبينك
مش بس فرق واحد دول الف حاجز
في سور عالى مابيني وبينك
انا واحد من يومي شايل شيلتي
مش بس حامل همي لوحدي
كمان هم بيتي وعيلتي
من وانا عيل صغير عارف يعني ايه العيشة
واللي عايشينها
عارفه يعني ايه نتعب ونشقى علشان بس
يدوب نقدر نعيش؟
يعني ايه أشتغل من الصبح لبعد العشا
و بردو ما يكفيش
دنيتنا صعبة عليكِ أوي ما تفكريش
بنجري يمين وشمال ندور على أي شغل وخلاص
وفى الاخر كله اكل عيش
صحيح أنا اتعلمت أعلى تعليم لكن التعليم ما نفعنيش
كل شهاداتي متعلقة على الحيطان وبقت
خلاص ما تساوييش
ودي حالة ما ترضيش
حياتي غير حياتك بالمرة ما تقارنيش
أنا من البداية بقولك علشان تفكري كويس وبالوهم ما تتعلقيش
حبيت أكون صريح افهميني صح ما وما تزعليش
انا صحيح اتمنيتك أيوة أنا اتمنيتك وحلمت لكن من حلمي فوقت وصحيت وقلت ما اعذبش نفسي وما أعذبكيش
شوفي انتي عايشة فين وانا عايش فين
هتلاقينا مختلفين مش متشابهين
هتقولي هعيش معاك لو حتى فين
صدقيني الحياة هنا صعبة عليكي
دا عمر طويل مش مجرد يومين
اسمعي مني هاقولك كلمتين
أيوة في ألف فرق وفرق ما بين عيشتي وعيشتك
بصي على لبسي وبصي على لبسك
لبسي مالوش ماركة ولبسك ماركات وعلامة
مشهورة فرو وريش
بصي على بيتي وبصي على بيوت منطقتك
بالمنطق ما ينفعش من الجنة ونعيمها للنار انا اجيبك ماتفكريش
بسهولة قادر عن حالي ده بحكيلك
هتصحي من النوم تقولي عني أنا سبب تعذيبك
وهتقولي ياريت لا عرفتك ولا اتسببت في تغريبك
أيوة انا اتمنيت أنا مش بنكر
دنيتي غير دنيتك انا مش هافكر
هدعيلك ربنا يسعدك مع حد يقدر
حد يقدر يوفر لك كل اللي عليه أنا مش هاقدر
انا اتمنيتك لكن مش كل اللي نتمناه بيتحقق
الحياة نصيب ومقدر
اتمنيتك لكن بجد أنا مش هاقدر
