الشاعر محمد عبد العزيز رمضان
يا أهل الهوى أنا قلبي احتار
مش طايل أنا جنة ولا نار
ورماني موجه كدا ف تيار
مش عارف أبعد ولا اختار
عايش ف توهة وبحر مرار
كان نفسي آخد مرة قرار
وخلاص شبعت من الأعذار
هبعد وأسيبه بدون إنذار
أنا مش راح اندم ولا هنهار
هبني ما بنَّا حبيبي جدار
عمر اللي بنَّا ما كان أسرار
بس أنت بعت بألف حوار
قاسي وأناني كمان غدار
بس الزمن دايماً دوار
يا أهل الهوى أنا ليا حبيب
يا خسارة تايه عني غريب
أنا كنت فاكره بجد قريب
علطول بيبعد عني يغيب
وكأنه غاوي كدا التعذيب
أمرك حبيبي بجد عجيب
كل اللي بنَّا مالهش طبيب
ولا يوم هتلقى ما بنَّا نصيب
يا أهل الهوى دايماً موعود
بالحزن فرحي مالهش وجود
ياما خدعني بكتر وعود
وطريقنا أصبح كدا مسدود
وحبيبي تايه مش موجود
كان نفسي يوم يرجع ويعود
يملي حياتنا بشوق وورود
بعدك حبيبي دا كان مقصود
يا أهل الهوى حبيته زمان
كان ليه ف قلبي بجد مكان
طلع أناني مالهش أمان
باع حبي فجأة وسبني وخان
أنا عشت بعده سنين أحزان
يا ريت ماشفته وحبه ما كان
