محمد جمعان الدوسري
من لا لقى من ضكة الوقت تكشير/
ماظن يصبر في التعب ربع ساعه
ومن لا شرب كأس الشقا يومه أصغير/
مايعرف اللي شاف غيره وراعه
بعض الحكي رسمةحروف(ن) وتبهير/
شخص بعيد(ن)عنك قاصر ذراعه
وأنا حملت الوقت أول بتقدير/
وشلته وعناني بعزم وشجاعه
لكن غلبني غصب من دون تفكير/
مني ووراني التعب في براعه
حتى طوتني اسنين من غير تبصير/
في نصف قرن(ن) وانكشف لي قناعه
اتلفني لف الرحى وين ما اسير/
دنيا عناها ما يهني متاعه
في غاربي يلوي و من غير تقصير/
يزيد عصري بالاسى في اندفاعه
شربت منه دلال وشربها غير/
من ذاق حزني كيف تصبح طباعه
ماأظن يبكي من شرته الدنانير/
مثل العليل اللي قصر فيه باعه
فإن جاك من يحمل اصكوك التدابير/
أسأله هل ناش التعب من شراعه
هو ذاق مر الوقت ذوق المعاسير/
حتى الدموع ازرت تبلل نطاعه
الليل يعوي والصبح بالمخاسير/
مرعب ومن شال التعب مااستطاعه
يعرف كلامي والبلاوي مغادير/
من شاف هول الحزن والهم راعه
