الكاتب :سمير الشحيمى
فيلا مصعب
أشرقت شمس الصباح الكل توجه إلى عمله وأشغاله؛ الجو اليوم جميل شبه مغيم ونسمة هواء عليله يبعث لنفس الراحه والطمأنينه.
شركة مصعب
أصيله تدخل الشركة واتوجهت لمكتبها استقبلتها السكرتيرة شيماء قالت لها : صباح الخير أم نايف ينتظرك العم فارس بغرفة الضيوف.
أصيله : يالله بصباح خير شو عنده فارس من أول الصبح؟
شيماء: علمي علمك طال عمرك.
أصيله: يالله بسير اشوفه أنتي وصي بثنين قهوه لنا.
شيماء : ابشري طال عمرك.
دخلت أصيله على غرفة انتظار الضيوف ولقت فارس وقالت: صباحك نور وسرور أخوي فارس كيف الحال؟
فارس : الحمد لله بخير أنتي كيف حالك وكيف صحة أخوي مصعب؟
أصيله : الحمدلله مستقره لله الحمد وعلى وضعه نتريا معجزه تصير عشان يقوم من غيبوبته.
فارس : الله يشفيه ويعافيه ويقومه بالسلامة يا رب.
أصيله : اللهم آمين؛ تفضل شو بخاطرك جيتك اليوم على اول الصبح فيها شي عسى خير ان شاء الله.
فارس : الخير بوجهك بس جاي اسدد باقي المبلغ المستحق لشركتكم عن آخر بضاعه استلمناها.
أصيله : أنت رجل أعمال ناجح ومتميز أخوي فارس عشان كذيه زوجي مصعب يحبك كثير.
فارس : الحمد لله معرفتي بمصعب قديمه منذ الطفوله.
أصيله : الله يديمها من محبه.
فارس:بس وقعيلي على هاي الأوراق انه اخلاء طرف وما في مطالبات ماليه بينا.
أصيله : حلو بس ليش هذا كله يعني أنتوا مازلتوا تستخدمون مخازنا مستأجرين جزء كبير منها لصالح شركتكم.
فارس : لا خلاص أنا قررت مع مجلس إدارة شركتي إنه نحول بضاعتنا لستورات ثانيه.
أصيله مفاجأة : بس ليش شو اللي صار؟
فارس :ماصار شي بس لقينا عرض أفضل وسعر أفضل ومغري بمخازن ثانيه.
أصيله: نحن بينا اتفاق واللتزامات متبادله وعقد شراكة هالشي بيخلي شركتك تدفع مبالغ تعويضيه على حسب البنود المتفق عليها.
فارس: كلامك صحيح أم نايف وأنا اشهد إنك سيدة أعمال ناجحه بس فاتك شي أن العقد اللي كان بيني وبين مصعب إنتهى من 4 شهور تقريباً وما تم تجديده لحد الآن وبكذيه يحق لي البحث عن الأفضل لي ولشركتي.
أصيله:مستعده أوقع معاك إتفاقيه جديده مع شروط وبنود جديده وتناسبك وبسعر ممتاز.
فارس :ياليت أم نايف بس هالوقت أنا وأنتي نتكلم هناك محامي الشركة يجهز أوراق جديده مع مخازن جديده بس يجهزون بسير أحضر التوقيع.
أصيله بغضب متكتم:يعني خلاص مافي أمل؟
فارس : كنت أتمنى بس هاي تجاره ولازم كل واحد يشوف اللي يناسبه.
اصليه : بهاي صدقت؛ لك جزيل الشكر وربي يوفقك تقدر تتفضل.
فارس : تحياتي وراح نلتقي بأعمال أخرى إن شاء الله مع السلامه.
طلع فارس من الشركة مبتسم إبتسامة انتصار وترك أصليه تاكل بأعصابها لأن شركة فارس من أفضل العملاء لشركة مصعب وخسارته تعتبر خساره كبيره.
البنك
يدخل طارق بسرعه على مكتب نايف اللي يقوله نايف: هيه شوفيك كذا داخل علي بهاي الطريقه سلامات!
طارق يبلع ريقه بصعوبه ويجلس قال: ألحق يانايف ألحق هذا اللي ماحسبنا حسابه.
نايف : شو هو تراك ربكتني.
طارق : صاحب الوديعه المليونيه الشايب اللي منوم بالمستشفى صارله شهور.
نايف: خير شوفيه عسى يكون مات.!
طارق : ياليت كان ميت الريال وضعه الصحي يتحسن وطلعوه من العنايه المركزه من شوي.
نايف: يالله كله منك يا طارق كله منك واللحين شو نسوي؟
طارق : لا تقول شو نسوي قول شو راح تسوي أنت.
نايف: نعم شو تقول نحن شركاء بهالشي مع بعض.
طارق : شركاء بين بعض صح بس رسميا أنت اللي بالواجهه وأنت اللي كنت تتلاعب بأرقام الودائع.
نايف يمد إيده ويمسك دشداشة طارق: يالحقير النذل سويتها فيني واللحين تتبرأ مني.
طارق : وخر إيدك عني وأنت المسؤول الأول والأخير.
نايف: أنا مب غبي عشان اطيح بروحي كنت حاسب أحساب هالشي؛ طلع نايف تلفونه وشغل تسجيل فيه صوت طارق مع نايف وهم يتفقون على المبالغ اللي بيتم أخذها سكت طارق وقال:سويتها فيني يالنذل.
نايف: تحسبني غبي ما يكون معاي شي يدينك اللحين خلينا نهدء ونشوف شو راح نسوي قبل عن يكتشف حد لعبتنا نحن الاثنين.
فيلا مصعب
المساء الكل متواجد فالبيت وأصيله طلعت من مكتب مصعب وقالت للخدامه تحط العشا وجلست أصيله بالصاله مرت عليها سندس وجلست معاها قالت: هلا عمتي كيف أمورك.
أصيله : الحمدلله بخير وين نايف؟
سندس : بغرفته بعد شوي بينزل تصدقي من رجع من دوامه وهو ما على بعضه سرحان ويفكر أسأله شوفيك يقول مافيني شي.
أصيله: يمكن عنده مشاكل بالعمل شي طبيعي بس أنتي لا تصدعي راسه بكثر الأسئله
سندس : أنا زوجته عادي يفضفض حقي عشان يرتاح.
أصيله : وقت غايته بروحه بيخبرك خلاص عاد.
نزل حيدر مع تماضر جلسو قال حيدر :كيف العشا بعده ماجهز؟
أصيله : ماباقي شي بيحطونه على الطاوله.
شوي نزل نايف من فوق قالت تماضر : وين الثنائي المرح ماشفتهن اليوم؟
أصيله : من قصدك مزن وحياه؟
حيدر : في حد غيرهن.
أصيله : مزن راحت الشاليه مع صديقاتها بمحضه وأما حياه ماعرف عنها.
نايف : ترا هاي البنت وايد مدلعتنها ليش مخلتنها تسير محضه بروحها وشوفي الساعه كم متى راح ترجع.
أصيله : أول شي البنت هاي أختك أسمها مزن ثانياً ماخذه الأذن مني وأنا كبيرت العايله ثالثاً راح تبات هناك بترجع بكره.
حيدر : شو هو استعباط ليش وافقتي تبات بروحها بالشاليه مع صديقاتها من دون محرم.
أصيله : تكلم عدل جدامي أنت وياه أنا أمكم ومالكم دخل بلي أقرره واسويه تفهمون أو لا كل هالخير اللي جالسين مستمتعين فيه بفضل زواجي من مصعب حطو هالشي ببالكم.
الكل في حالة صمت جات الخدامه قالت العشا جاهز تفضلوا.
الكل راح الطاوله وتماضر تتصل على حياة جهازها مصكر تحاول أكثر من مره لكن نفس النتيجه جهازها مغلق جلست تماضر جنب زوجها حيدر وهمست بأذنه قالت : أتصل على حياة بس جهازها مصكر
حيدر : يمكن مافي شحن؟
تماضر : ماعرف بس قلبي ما مطمن.
أصيله اطالعهم وقالت : في شو تتساسرون؟
حيدر: ولا شي الوالده بس تماضر تتصل على حياة بس جهازها مغلق.
أصيله : لا تحاتو يمكن مفضي جهازها أو مع صديقتها ميره مصيرها ترجع البيت وين راح تروح.
قالت كلماتها الأخيره وفي عينها لمعة خبث.
يتبع…
