المهدي تركي الرياحي
البارحه مدري علام النوم من عيني يطير
كل الطوارئ اللي طرت لي قستها بالمسطره
يارب تجعل كل ما نكره يجي شئ يسير
واللي يريد الشر فينا انت عنا تدحره
الواقع اللي نعرفه في كل شئ انه يصير
والناس يغلط من غلط لكن ربي يستره
فكرت بالدنيا مثل ما فكر الحذق الخبير
احد جميع اعماله لدنيا واحد للاخره
ان طاح مقدار الكبير يبقى وهو طايح كبير
لو تنحته هوج الرياح ماحركة منه اشعره
مايفرح وتسمع شماته غير من شخصٍ حقير
اللي ما يطعن غير اخوه اللي يلقيه اظهره
الله يا الدنيا لو انتي فيك شر وفيك خير
نصف البشر تبني القصور ونصفهم بالمقبره
ماعندي الا زفرةٍ ارسلتها عبر الاثير
يوم ان الاسماء نصفها سالت عليه المحبره
ان كنت عامل فا البناء وان كنت في رتبة وزير
هذا وهذا كلهم …ارزاقهم متيسره
الله كفيل ارزاق خلقه كل من طار ويسير
اجالها .. وارزاقها .. مكتوبة .. ومقدره
وترى الكريم اليوم مهوب الذي ماله وفير
يكرم بمالٍُ ربي اعلم كيف جاء من مصدره
لكن سلملي على راس الكريم اللي فقير
اللي يحط المال شيً دون وجهه يستره
