رضا الهاشمي
تِراوى لي طيفكْ شمْس تضْوي و بُعْدكْ غيْم
فلا شيّ يحْجبْ طيف رُوياك عنْ بالي
يا عدْن المَحاني و إنْته لي كأْس منْ تسْنيم
حَلَاتَهْ تَرَى أحْلا من الدّوعن الحالي
ظما الشّوق في صحْرا رحل عنْ سماها الدّيم
يدوّر ع واحة قرْب في ربْعها الخالي
أسَدْ كنْت في قرْبك وفي صدّتك يا الرّيم
عرين اشْتياقي منْ عَتيّ الجفا مالي
يا والي الحشا قدْرك لهْ المجْد والتعْظيم
أنا تحْت أمْر اعْيونك السّود يا الوالي
يا منْ فزْت بالخفّاق تسْتاهل التكْريم
أقدّم فوادي جائزةْ لْقلْبك الغالي
متى اتْعود واتبشْ لكْ عروق الخفوق احْريم
متى ترْزف الأشْواق لكْ رزْف لرْجالي
تبي تعْرف اشقدّ الحشا في غلاك ايْهيم
ليا رحْت عنّه صاح يا ويل أنا حالي
بلا شوفتكْ حالي ترى هاء قبْل الميم
وأحسْ نبْض قلْبي ميم ٍ و حاء ٍ و دالي
حصون اللّقا في الصدّ تحْتاج للترْميم
عواصيف بُعْدكْ طيّحتْ سُورَها العالي
ع شوفكْ عَقَدْ قلْبي إرادتهْ والتصْميم
مثِلْ ما تِعِقْد العزْم ع الحرْب الأبْطالي
جديد اشْتياقي لو مسلْسلْ لقاك اقديم
من امْسلْسل أشْواقي شف المشْهد التّالي
ثكالى أحاسيسي وْ شعور الفراق ايْتيم
وعجوز الصّبر في غيبتكْ ثوبها بالي
