الشاعر غسان أبوعلي -
يا نهر يا عامل الغيم جياب
ولابس من زهور الضفافي تياب
الاعشاب شابو بشعرك المنذور
فزعان حولك يذبلو الاعشاب
كتابك الوادي والجلالي سطور
وضو القمر حامل بإيدو كتاب
والشمس حول الفي عم بتدور
وما بتلمحك الا ترم لغياب
وسحّابك بينزل بهمس النور
وياما لمس من هالودايا رقاب
والعتم واقف عالشفق ناطور
ناطر بإيدو يبكل السحاب
الغيّاب غابو خلف سبع بحور
انشالله قريب منقشع الغيّاب
وبيحلم الغصن بدفا عصفور
العصفور رح بيعود يا عنّاب
وميّاتك العملو السواقي نهور
والمي ما بتعود للمزراب
ومتلك انا يا هالنهر مقهور
ع فراق ولفي العن عيوني غاب
بْلا اعتراض المتلنا معذور
الأحباب غابو يا نهر عنّا
من وين بدهم يرجعو الأحباب
