سيد جعيتم
لقيط
وعيت على دنيتي
غريب وحيد ف الكون
عايش أسير محنتي
شايل هموم بالكوم
وجعاني قوي بلوتي
ووجعي لمين أشكيه
يا رب دي قسمتي
جرح نفسي .. يهون
وأنا صابر
ومش قادر
أعيش غريب خطوتي
في الدنيا شبعان لوم
ولما تزيد محنتي
أتعكز على دمعتي
عايش وأنا حاير
ما بين الناس متعاير
وفين أمي تشيل عني
وتمسح دمعة من عيني
خايفه ف يوم تتشاف
وأدعي وأقول يا رب
أوهبني ضمة قلب
لجل أقدر أشيل حملي
دا تقله رزيل وتانيني
سنين كاتم مرار وجعي
ولا بشكي
ولا قادر في يوم أحكي
و أحكي … لمين
لدنيا قاسية حوياني
وبتلومني
ولومها يرن في وداني
يغرقني في بير
ملياه دموع عيني
و نفوس الناس
ما يوم بتروق
مليها الشوك
تجرعني مرار الكاس
وقولهم ياما عراني
و راس مالي
يا دوب هدمه
بميت رقعة وستراني
بحلم كتير بضليله
وشمس ولمة العيلة
وكسرة عيش ولو ناشفة
أشاركها مع أخواتي
و أمي بنظرة من عينها تغطيني
وأسمع أبويه بيصلي
ومن قلبه بيدعيلي
في الملجأ أنا ياما صبرت
لحد ما يوم
قالولي كبرت
مكانك أحق بيه غيرك
جنب الحيطان لقيناه
وحكايتي تاني تتكرر
والأيام تدور وتلف
وما بتتغير
ووصمة عاري دباحني
وإبن حرام… ملزماني
ترن دايمًا في وداني
ولا حيطة تداريني
ولا لغلبي ضليلة
ياناس.. يا خلق دلوني
أروح على فين
