الكاتب :سمير الشحيمى
فيلا مصعب بالبريمي
دخل مصعب على غرفة حياة ومزن كانن يغطن بنوم عميق بعد يوم طويل بالمزرعه واللحين رجعو بيتهم؛ يمشي مصعب بتجاه سرير حياة يغطيها عدل يطالع وجهها وهيه نايمه بعدين طلع من الغرفه وراح يجلس بمكتبه يفتح الخزنه ويطلع بعض الأوراق منها وجلس خلف مكتبه وجلس يقلب الأوراق ويقرأ اللي فيها بنفس الوقت يتذكر كلام فارس وهو يوصيه أنه يكشف المستور قبل فوات الأوان؛ يتنهد بقوه مصعب ويقول حق نفسه : يالله ماباقي شي باقي خطوه أخلصها وراح أحط كل النقاط على الحروف وغمض عينه.
وفي اليوم التالي الكل صحى من النوم وتوجه لدوامه واشغاله؛ حياة ومزن بالجامعه وفي الحرم الجامعي تقول حياه لمزن: تعرفي أن حماس الإجازه اللي قضيناها بالشاليه بعدها مشحونه بجسمي ماطاعت تخلص.
مزن: حشى لهاي الدرجه هذا كذيه مزرعه بمحضه كذا استوى فيج شو راح تسوين إذا كان عدنا شاليه على البحر.
حياة: على البحر وناسه بيكون قمة الروعة والجمال.
مزن : أقول أنا بسير عنج إذا جلست معاج دقيقه زياده بتصيبيني بعدوى الطاقه اللي معاج؛ طاحت عينها على ميره وكملت كلامها: هاي ربيعتج الخبله كملي معاها نتلاقى بعد المحاضرات.
راحت مزن وهيه تبادل نظرات مع ميره وقالت ميره: هلا حياة شحالج شو هاي اختج ماتعرف تقول السلام عليكم صباح الخير.
حياة : تعرف بس الزبده هيه ما أدانيج وأنتي بعد ما أدانيها ماله داعي نفتح نفس الموضوع كل مره.
وفي الشركة تحديدا بمكتب مصعب وهو يراجع أوراق بالملف جاه إتصال على تلفونه رد على المكالمه: هلا اخوي فارس صباحك نور وسرور توني أقول بتصل عليك بس أفضى من الشغل اللي بين أيدي.
فارس: ترا قالوها الطيب عند ذكره.
مصعب وهو يضحك : هيه والله صدقت كنت؛ أتصالك أكيد في شي مهم قول شو بخاطرك؟
فارس: بعدك فطين كعادتك.
مصعب: لا والله مب اذاك الزود بس أنت أخو دنيا واعرفك من نبرة صوتك.
فارس: بالفعل الغالي كنت أريد ترسلي شاحنتين 3 طن من عندك إذا ماعندك زحمة شغل لأن عندي طلبية مهمه لزبون في عبري ولازم تتسلم اليوم قبل المغرب ولا بدفع غرامه على التأخير على حسب النص اللي بالعقد والمشكله طلعن 3 شاحنات وشاحنه وحده تعطلت والثانيه منتهيه المندوب إجازه ماخلصها من المرور.
مصعب: حتى لو مشغولات الشاحنات عندي بفضيهن عشانك أفا عليك نعين ونعاون.
فارس: كفو عليك ينشد فيك الظهر بس على شرط كل شي بحسابه بستأجرهن من عندك ولا تناقشني.
مصعب وهو يضحك: ومن قال أصلا ببلاش قرقش مخباك أكيد هذا السوق مايعرف أخوي ولا أبوي.
فارس يضحك : أيوه كذيه أباك.
مصعب : أنا بتصل على قسم المخازن عندي وبقول لهم يوفرولك شاحنتين تبيهم مع السواق؟
فارس : لا بس الشاحنتين السواق اللي معاي موجودين.
مصعب: بس تمام الأمور طيبه يالله مع السلامه.
صكر التلفون ونادى على السكرتيره شيماء وقال لها: أتصلي على قسم المخازن يفضون شاحنتين للي متجهات محضه ويعطوهن حق سواقين شركة فارس للتجاره.
شيماء: بس طال عمرك الطلبيه هاي تنتظر من يومين ووجب تسليمها اليوم لمحضه ولا راح ينقص من قيمة البضاعه بسبب التأخير.
مصعب:مب مشكله ينقص أهم شي أخوي فارس ما يتعطل شغله.
شيماء :إن شاء الله طال عمرك اللحين بكلمهم؛ بخصوص وكالة السيارات مندوب الوكاله موجود بإنتظارك.
مصعب:خليه يدخل وخبري الفراش يسوي لنا نسكافيه.
فيلا مصعب
تماضر تتجهز للعمل تمر على عمتها أصيله بالصاله تسألها: وين رايحه الدوام؟
تماضر : هيه والله ياعمه.
أصيله: بس الساعه 11 الصبح كأنك متأخره؟
تماضر: تعرفي العمل في سكن الطالبات الإشراف بالشفتات وعاد شفتي الضحى لين 7 المساء.
أصيله: يالله زين ديري بالج على نفسج.
تماضر : إن شاء الله بس غريبه اليوم ماطلعتي مكان.
أصيله : والله كذا مالي مزاج حق أي شي اليوم.
تماضر : يالله عساه خير أنا أستأذن مع السلامه.
الجامعه
حياة في قاعة المحاضره وصلها مسج بتلفونها تقرأ المسج إنه من مصعب ويقول فيه إنه بيمر ياخذها بنهاية المحاضره.
المستشفى
سندس تكشف الضغط لأحد المرضى وبعدها يدخل المريض عند الطبيب تمر عليها ضحى تسألها: سندس اليوم من بقسم الولاده من الممرضات؟
سندس : هالاسبوع بيكون هناك كامله وفيض ورجاء ومعاهم فريق من المتدربات من الجامعه.
ضحى: أها بس تمام أنا سايره قسم الأشعة إذا حد سأل عني بكون متواجده هناك.
سندس :تمام.
فيلا مصعب
أصيله تطلع من المطبخ بعد ما عطت تعليماتها للخدامه بخصوص الغداء؛ وراحت بتجاه السلالم تصعد فوق لغرفتها انتبهت أن باب مكتب مصعب مفتوح شوي راحت بتجاه المكتب ودخلت داخل المكتب رتبت الأوراق اللي على الطاوله وكانت هناك صورة لمصعب وهيه معاه إبتسمت إبتسامه خفيفه؛ جنب الصوره في صوره ثانيه كانت لحياه وهيه طفله بنت 7 سنوات تلاشت الإبتسامه عن وجهها ونزلت الصوره على وجه البرواز؛ تحركت أصيله عشان تطلع من المكتب لاحظت ورقة طايحه تحت الخزنه أنحنت وخذت الورقة وقرأت بلي مكتوب فيها وكانت هنا الصدمة.
الجامعة
حياة مع صديقتها ميره واقفين يسولفون مع مجموعه من البنات وقفت سياره بالقرب من المواقف كان بالسياره مصعب ينادي حياة اللي جات حقه مسرعه وقالت: هلا أبوي مصعب ها وين تبينى نسير وشوف سيارة جديده وااايد حلوه.
مصعب وهو ينزل من السياره : عادي أي مكان تحبيه كيف عجبتك السياره؟
حياة: وايد حلوة.
مصعب : شو رايك حبيتيها؟
حياة : أكيد ولونها واايد حلو متهني أبوي الله يعطيك خيرها ويكفيك شرها.
مصعب : الحمد لله إنها عجبتك يالله عيل وين تبينى نسير؟
حياة : نتغدا بالكنتاكي شو رايك؟
مصعب : صعبه شوي لأن عمتك أصيله راح تعصب وتحصلين الغدا جاهز بالبيت.
حياة: أممم كلامك صحيح انزين بنسير كوفي نشرب كوفي وتصوير وحركات.
مصعب: بس حلو يالله سرنا.
تحرك مصعب يركب بكرسي اللي بجانب السايق استغربت حياة: وين أبوي مصعب من راح يسوق؟
مصعب : أنتي راح تسوقي أركبي بسرعه.
حياة ركبت مامصدقه وقالت: غريبه مخلني أسوق ما من عوايدك.
مصعب: جلست أفكر كثير لما كلمتيني الأسبوع الماضي عشان كذيه قلت لازم يصير معاج سياره حالك من حال أخوانك.
حياه: تقصد أن…
مصعب : أيوه هاي السياره الجديده حقج خاصه فيك وبنت التاجر مصعب ماتركب أي سياره.
حياة : والله مب مصدقه مشكور أبوي مصعب.
مصعب: هاي الفرحه بعيونج كم تسوي عندي يابنتي اللحين اربطي حزام الأمان وتحركنا أشوف مهاراتك بالسواقه.
يتبع…
