الشاعر : محمد عبد العزيز رمضان
إوعى تفتكر الصيام
أكل و شرب والسلام
الصيام معناه كبير
أصله إحياء الضمير
إننا نحيي اللي مات
قبل ما نصير ذكريات
نمحي من بينا الخداع
نفتكر كل اللي فات
إوعى تفتكر الصيام
إننا نعطش وبس
لا دا معناه إلتزام
والغني بغيره يحس
مهما عشنا راح نموت
والكلام يصبح سكوت
كل حى راح يفارق
مش هيبقالنا وجود
أبني عمر بالصلاح
خفف الحمل التقيل
هو مفتاح النجاح
الطريق صعب وطويل
إوعى تغفل أو تنام
العبادة مش كلام
هيا نور يجلي القلوب
هيا إصلاح للعيوب
هيا تركك للمعاصي
مش تكاسل أو هروب
إوعى تفرح بالشباب
الشروق يتلوه غروب
السعادة مش فلوس
أو غنى أو كتر مال
أو بإنك يوم تدوس
عل الرقاب زي العيال
السعادة في كلمة واحدة
السعادة في الحلال
وإن خسرت بكرا تكسب
أوعى مرة تقول محال
بالعزيمة راح هتقدر
تبقى أقوى من الجبال
