الكاتب :سمير الشحيمى
في السيتي سنتر
أصيله وصديقتها المقربه شذى يتسوقون بالمول قالت شذى : حصلت قطعة خام تجنن في المحل الثاني بنسير نشتريها.
أصيله: أوك بس بعدها بنسير محل الذهب فخاطري أشتري خاتم جديد.
شذى: ما يمنع ليش لأ.
وفي منتجع السلام وصل مصعب لقاعة المؤتمرات للإجتماع بالوفد الكوري ومعاه السكرتيرة شيماء.
مصعب باللغه الانجليزيه : هلا فيكم شرفتو زيارتنا في بلدكم الثانيه سلطنة عمان وتحديدا في ولاية البريمي.
الوفد الكوري: أهلا وسهلا بك سيد مصعب كنت أطوق اللقاء بك منذ فترة.
مصعب: فلنبدأ الإجتماع إذا.
بمكتب حيدر في وزارة التربيه والتعليم ينهي أعماله المكتبيه زميله بالمكتب محمد يقول لحيدر: كيف تتوقع هاي السنه في ترقيات؟
حيدر: تعرف أن الترقيات موقفه من زمان من 2012 ليش تجلس تفكر بالترقيات؟
محمد: لو حصلنا ترقياتنا على أثر رجعي تعرف كم بيوصل راتبي؟ راح تنحل مشاكلي الماليه مب كلها بس بيخف من ظهري حمل كبير
حيدر: عسى ينزل قرار ونحصل على ترقياتنا.
محمد: الصغاريه صدعه وطلباتهم وطلبات مدارسهم والبيت وزوجتي أثير طلبات ماتخلص أحس راسي بينفجر.
حيدر: تجلس تفكر لازم بيصدع راسك؛ وكل أمرك لله سبحانه بتتيسر.
محمد: والنعم بالله أقولك حيدر بحصل عندك سلف؟
حيدر يطالع محمد وقال: الأسبوع الماضي عاطنك والشهر الماضي بعدك مارجعتهن.
محمد :أنت عارف وضعي برجعهن بس أنتظر فلوس الجمعيه الشهر الجاي ينزلن برجعلك كل ريال خذيته منك وعد.
حيدر يطلع محفظته ويحط مبلغ على الطاوله: هذا اللي معاي ماشي غيرهن وربي يسهل أمرك.
محمد بفرح: والله إنك صديق كفو وينشد فيه الظهر مشكور حبيب قلبي الله يفرج عليك.
سندس ممرضه بالمستشفى بعيادة الأسنان تنادي على مريض يدخل على الطبيب كلمتها صديقتها تهاني : ها كيف شكله مافي مراجعين اليوم كثير؟
سندس: من قال بعده الوقت متعودين من بعد الساعه 10 تستوي زحمه تقول متفقين مع بعضهم بعض.
تهاني: أنتي صادقه البنات بالقسم الثاني طالبين أكل من المطعم إذا بعدج ماتريقتي روحي تريقي معاهم.
سندس: متريقه وخالصه ماريد أثقل بالأكل بطلع أتغدا اليوم مع زوجي من بعدها بنسير السينما.
تهاني : هالله هالله حلو ياحلو
سندس: في عقد ذهب عجبني بسوق الذهب وأبي زوجي يشتريه.
تهاني: هو كريم وأنتي تستاهلي ؛ صحيح وينها ضحى أخت زوجك ماشوفها اليوم؟
سندس: موجوده بعيادة العيون تغطي مكان أحد الممرضات.
تهاني : أوك بشوف الدكتور إذا فضى عشان أدخل البيشن معاه.
وفي البنك نايف يطلع من مكتب مدير البنك ويرجع مكتبه ويكلمه زميله طارق اللي معاه بالمكتب: شكله المدير عاطنك شغلك من المنازع باين على وجهك.
نايف وهو معصب: أنا مراجع أرقام المبالغ اللي يودعها العملاء بس هو يقولي في أخطاء ولازم أدقق أكثر.
طارق: عدل علاقتك مع المدير وبترتاح لأنك وااايد تراده وتعرف في مدراء يبون يكونو هم الصح دائماً.
نايف: أقول خلني أخلص هاي الأوراق وراجعهن لأنه يبيهن ظروري قبل نهاية الدوام.
طارق يرفع سماعة التلفون : بطلب فنجان قهوة حقنا عشان تفتح مخك شوي.
نايف: زين ماغلط
وفي الجامعه مزن تطلع من المحاضره ومعاها صديقتها أفنان وتقول حقها : الدكتور مدحت وااايد يطول بمحاضراته يملل.
أفنان: بالعكس أنا أرتاح لمحاضراته.
مزن : عشتو مالت عليج أنتي وياه.
أفنان: مالت عليج أنتي قومي نسير الكافتيريا ناكل لنا شي جوعانه.
مزن: قبل المحاضره ماكلين أنتي الأكل وين تودينه.
أفنان: هنا يروح بالمخ وتركيز على المحاضرات.
مزن: حسستيني بحصلج بجامعة بوسطن تكملي دكتوراه حدك راح تكوني تشتغلي بشركة.
أفنان : ليش لا؛ كل شي بيصير مع الإصرار العزيمه.
مزن: قومي نسير الكافتيريا لما تكوني جوعانه تحلمي وايد.
أفنان : شوفي هاي أختك حياة خليها تجي معانا.
مزن : ويع انتي بعد لاتقولي أختي وبعدين ماداني ربيعتها الملقوفه ميره سرنا سرنا لا طالعيهن وايد.
وراحت مزن أفنان للكافتيريا؛ بالمقابل واقفه حياة مع صديقتها ميره قالت حقها: هاي أختج مزن واايد شايفه نفسها.
حياه : شو تبي فيها خليها على راحتها.
ميره: بس صدق أنتي غير عنها بوايد برغم انكن خوات.
حياة :هيه مب أختي أختي بس عايشين بنفس البيت.
ميره:أيوه خبرتيني بس العم مصعب أبوج.
حياة:هو اللي رباني وتبناني وسجلني بأسمه بس هو مش أبوي وأنا بنت يتيمه.
ميره: دام إنج مسجله إنك حياة بنت التاجر مصعب أنتي تعتبرين بنته ولا تخلي هالشي يفارق بالك وأنتي الأساس مب مزن وإخوانها.
حياة: أقول أنتي فاضيه قومي نراجع قبل عن تبدأ المحاضره الثانيه.
ميره: أوف منج.
مصعب مع الوفد الكوري يتناولون وجبة الغدا ومن بعدها ترك الوفد يرتاح بالفندق وهو طالع من المنتجع تصادف مع صديقه القديم فارس وقال له: هلا والله فارس ما شاء الله أشوفك هنيه.
فارس :هلا فيك مصعب أيوه عندي ضيوف من قطر نازلين بالفندق واللحين غدا عمل بخصوص المشروع اللي كلمتك عنه.
مصعب: قصدك مشروع المول الجديد اللي حاب تفتتحه في النفحات؟
فارس : أيوه هوه؛ وأنت كيف أمورك؟
مصعب: توني مخلص إجتماع مع الوفد الكوري والأمور طيبه.
فارس: شو رايك نتلاقى المسا؟
مصعب : بكون مشغول خليها بكره شو رايك؟
فارس : بس تمام يالله مع السلامه.
في السينما نايف وسندس وخلص الفيلم سندس تقول: بصراحه فيلم ولا أروع
نايف: بالفعل جميل جدا وقصته أول مر أشوفها.
سندس : حبيبي ممكن اطلب منك طلب؟
نايف: أطلبي تدللي
سندس : حياتي أنت؛ حصلت خاتم واايد يجنن بسوق الذهب وخاطري اشتريه
نايف: اشتريه شو مانعك؟
سندس : أريدك تأخذه حقي
نايف: عندك راتبك اشتريه؛ تعرفي عندي اللتزامات كثير ومن شهرين كنت مشتري حقج عقد ذهب بقيمة 1000 ريال
سندس: يعني ما أستاهل إنك تشتري الخاتم حقي وتدلعني؛ انت تعرف راتبي مايكفي حق أقساط السياره والبترول ومصروف الدوام ومستلزماتي الخاصه من صالون وملابس.
نايف: عيل ماله داعي للخاتم وخليه لمناسبه خاصه أما اللحينه صعبه.
سندس: يرضيك ان صديقاتي كل وحده زوجها جايب لها هديه حلوه وأنت ماتبي تهديني خاتم ومب غالي والله بس 400 ريال
نايف: سندس غيري الموضوع لأن صدق ماعندي وفي شي أهم من الخاتم.
سندس :شو اللي أهم من الخاتم تبي تزعلني يعني أنت ليش كذيه.
نايف : يالله بس خلاص بنتفاهم بعدين.
سندس : رجعني البيت.
يتبع…
