حاتم الغيطاني.. مصر.
خلف الزجاج بسمة أم
رغم سنين الصعاب والتعب
ربت وضحكت وضحت
و على كل الظروف لحت
لأجل تشوف الولد
منهم شريف وسعيد
وأحمد وأبو السيد
آثار جهد السنين باين قوي
على حلق شباكها الخشب
اللي بيحكي موال الشقا والتعب
لكن من قلبها
بتبص وبتبتسم
والصورة بتعلم
والنظرة تتكلم
الوجه صافي وبشوش
و البرواز قديم ومافيش أي رطوش
يبقى الكلام صادق
و أكيد واضح ومش مغشوش
الأم دي جدة
وتلاقي فيها الطيبة
تزيل الهم في الشدة
تضحي بما عندها
لأجل الولد والحفيد
يأكل العيش معجون بالخير وبالزبدة
أنا أتحرمت من جدتي وأمي
أنا نفسي أكون جنبها أبص من الشباك
وأحس وأنا عندها
بالدفء اللي هناك
تسقيني شاي العصاري
وآكل قرص من إيدها
بالخير وبالزبدة
دي الست دي طيبة
دي ست الكل والحتة
الست دي ربت
وعندها جيل عظيم طيب
واللي يعيش بالحلال
عمره ما يتعيب
تسمع صوت الأذان
تصلي و لا تتغيب
وتطلب من ربها ولو مرة
تسعى بين الصفا والمروة
وتطوف ببيت الله
بالحج والعمرة
خالصة لوجه الله
مش منظرة وشهرة.
