محمد جمعان الدوسري
لا تستمع لي
وأنت في داخلك شك………………
ولاجدل أو ماتحب النصيحه
أبيك تنصت لاغدا القلب منفك………………….
والثغر بإسم والمراوي صحيحه
تأخذ وتعطي في موده ولا تصك…………….
باب المشوره ولا تروم الفضيحه
من لا يفكر في أموره إذا إنضك…………………..
يشرب هماج أهل العلوم الكليحه
خذ من حياتك درس لا تخور وتعك……………
ترى الزمن يبدي مساوي النطيحه
شوف الذي ضمه أسى الوقت واندك………….
وإعرف غلط غيرك..و جنب مطيحه
فإللي ذكرته سامني وفركن فرك ………………..
فرك(ن)رشمني والتجارب تتيحه
ترى التجارب للفتى تدعكه دعك………………
وتعلمه وين الملاوي القبيحه
لصرت تبغى الزين وماتقبل اللك…………………
فإعرف أذى الموذي وجنب فحيحه
فإللي يعرف الزين ويسبكه سبك……………..
يأخذ أعلوم أهل العقول الرجيحه
الليل لا اعتم ياصاحبي حلك…………………….
ومايعرف الساري طريق (ن)يريحه
ومن لا يشوف إسهيل والجدي ويعك…………..
في سبر دربه ماتواسى مطيحه
خذ من تجارب من مضى وخلها معك…………………
وإن كنت ماتدري فرأسك صطيحه
والتجربه طب الفتى تعركه عرك………
حتى يعرف الذاهبه والصحيحه
واللي يسووف ومايفكربها هلك…………………
كل الحزون المجدبه تستبيحه
والمسك لو طال الزمن ريحته مسك……………..
عطر(ن)يعطرطييب الطيب ريحه
واللى يرم الكير ماينفعه ترك……………………
ذاك المكان اللي تضووع لفيحه
كم واحد(ن)شفته وفي شوفته هك…………….
ويوم(ن)خبرته شفت نفس(ن)مريحه
والحي يجمح لين يسبر به الدبك………………..
يركض ويلهث لين يلقى ضريحه
