الكاتب :سمير الشحيمى
فيلا مصعب
غرفة نايف يطالع التلفزيون بروحه بعد نص ساعه دخلت عليه سندس وقالت له: تعبت بصراحه وأنا أقابل عمك مصعب شغل بالمستشفى وشغل هنيه بالبيت متى راح ارتاح.
نايف :مأجوره هاي وظيفة تسمى لملائكة الرحمه ولكن الملائكة وين وأنتي وين.
سندس : شو تقصد؟
نايف: ما اقصد شي بس هاي وظيفتك ونحن أمانه بين إيدك
سندس: الوضع لا يطاق أرجوك كلم أمك أنا مالي دخل في عمي وغيره عندها ممرضه خاصه جيبتها هيه عشان أدير بالها على العم مصعب ليش بعد تبيني أنا وياها.
نايف: لاتنسي حتى اختي ضحى معاج تجي شبه يومي عشان تعينك بالعنايه بعمي.
سندس : أختك بكيفها أنا لا خلاص.
نايف : تمام لا تضايقي بكلم أمي اليوم من بعد العشا.
قام وطلع علبه من جيب بيجامته ومدها حق سندس قالت : شنو هذا؟
نايف :افتحي وشوفي بنفسك.
فتحت سندس العلبه داخلها سنسال ذهب فرحت كثير سندس وقالت : بصراحه وااايد روعه وشكله غالي.
نايف: عيونج الحلوه والغالي يرخص للغالي.
سندس : مشكور حبيبي بس من وين جبت فلوسه اشوفك هاي الفتره وااايد تلعب بفلوس لعب.
نايف : الحمدلله شغل زين بالبنك وعطونا بونس علاوه على الراتب.
سندس وهيه تلبس السنسال : تجنن كثير تهبل.
نايف يناظرها بإبتسامه.
غرفة حيدر
تماضر تتكلم تلفون مع زميلتها في العمل بسكن الطالبات وشوي دخل حيدر الغرفه صكرت تماضر عن زميلتها وقالت: هلا ما شاء الله اليوم كنك متأخر عسى خير ان شاء الله؟
حيدر وهو يجلس : هيه نعم ربيعي محمد صار عنده بنجر واتصل فيني ورحت أساعده لأن ماكان عنده تاير سبير.
تماضر : يالله زين الله يعطيك العافيه بس أذكر أن بيته زميلك في صعراء.
حيدر : صحيح بس هو كان على طريق محضه كان طالع مهمة عمل من الوزارة لأحد مدارس محضه.
تماضر: الله يعطيك العافيه تبيني أحطلك غدا؟
حيدر: لا أحس بتعب باكل العصر من أقوم من النوم.
تماضر : أرتاح فديتك.
الجامعه
حياة مع صديقتها ميره في مكتبة الجامعه وحياة مندمجه تقرأ بكتاب وبجانبها ميره اللي قالت: تعبت من الجلسه كيف بعدج عن تروحي البيت لأن ماعدنا محاضرات العصر.
حياة وعينها ماتفارق الكتاب: لا بعدني بجلس لحد آخر محاضره أساساً قايله حق السايق يجيني قريب المغرب.
ميره: ليش عاد كله كذيه ماتبي تجلسي وتشوفي وجه عمتك أصيله؟
حياة : الود ودي أشرد من البيت وما أرجع أعيش فيه بسبب معاملتها لي لكن حسافه بنت يتيمه مثلي وين راح تروح لاسند لا أهل واللي كان يحميني بغيبوبته جسد بلا روح.
ميره: كان الله في عونك حبيبتي.
فيلا مصعب
الوقت متأخر من الليل أصيله في مكتب مصعب اللي بالفيلا تراجع أوراق ماليه خاصه بالشركة ثم ناظرت الخزنه وقامت تبي تفتحها وتحط أرقام عشوائيه ولكن ما طاعت تفتح خزنه اللكترونيه قالت أصيله تتكلم مع نفسها: خيبه شو هاي الخزنه جربت جميع أرقام اللي ممكن يفكر فيها مصعب ولكن للأسف مةولا رقم طلع صحيح؛ جلست تفكر شوي قالت محد راح يساعدني غير شذى أم الدواهي تتصل عليها وردت شذى : هلا أم نايف
أصيله : هلا وغلا أقولك أحاول أفتح الخزنه اللي بمكتب مصعب وجربت جميع الأرقام ولكن مافي فايده ولا واحد طلع صح.
شذى: أمممم جربتي تاريخ ميلادك؟
أصيله : كله جربتهم حتى تاريخ ميلاده هوه بنفسه مافي فايده.
شذى: رقم تلفونه؟
أصيله : جربت أقولك ماخليت ولا رقم ماخمنته.
شذى : عيل أي رقم بيكون حاط جربي رقم سيارته.
أصيله : بالفعل أنا ماجربت رقم سيارته لحضات.
تحاول أصيله ولكن من دون فايده قالت حقها : طلع غلط شو غيره!؟
شذى : ماشي غير تكسري الخزنه بأي طريقه ثانيه.
أصيله: صعبه لأن خزنه اللكترونيه ولها نظام أمني من شركة أمنيه هم الوحيدين اللي يقدرون يفتحونها.
شذى: إنزين خبريهم.
أصيله:هذا اللي بسويه باكر بخير ولدي نايف يتواصل معاهم.
شذى : تمام الأمور طيبه كيف بخصوص بكره السهره بتكون في المزرعه في محضه؟
أصيله :أكيد وخبري كب صديقاتنا يكونن متواجدات.
شذى : تمام أم نايف نلتقي بكره وانتي طالعه مري علي نسير مع بعض.
أصيله : اوك يالله باي.
صكرت أصيله الخط وجلست تفكر بعدين قامت تبي تطلع من المكتب طاحت عينها على صورة حياه اللي بالطاوله وقالت : صح أنا كيف ماجى على بالي تاريخ ميلاد حياة.
راحت تجرب وحطت تاريخ ميلاد حياة ولكن للأسف ما طاعت تفتح قالت بنفسها: هذا اي رقم حاط بس مب مشكله يامصعب أنا بعرف كيف افتح الخزنه واعرف شوفيها.
غرفة مصعب الطبيه في الفيلا
الممرضه تأخذ ضغط الدم لمصعب وهو موصول على الأجهزة الطبيه اللي تحافظ على حياته وشوي دخلت عليها أصيله قالت لها : طمنيني كيف صحته؟
الممرضه: المؤشرات كلها مستقره ومافي جديد الوضع مثل ماهو.
أصيله : مرات اكون اراقبه واجلس معاه احس ان يده تتحرك برجفه سريعه ليش؟
الممرضه: اغلب الحالات اللي تكون في غيبوبه يصير معاها هالشي يقولك شفناه يتحرك بس هيه حركة لا أراديه.
أصيله: بالعاده مثل هاي الحالات لما أطول كيف يتم التعامل معاها.
الممرضه : مافهمت من أي ناحيه؟
أصيله : يعني اذا الحاله ميؤوس منها يكون الموت راحه حق المريض.
الممرضه: اغلب الحالات تكون عايشه على الاجهزه يكون الموت راحه لها اكيد بس بعكس زوجك مصعب هو يقدر يعيش بدون الاجهزه بس راح يكون عنده التنفس صعب المؤشرات الحيويه ماراح تكون مستقره راح تهدد حياته للخطر فالأفضل يظل على الاجهزه.
صمتت أصيله وجلست تفكر وقالت بعدين :أبي منك طلب ممكن؟
الممرضه: تفضلي ام نايف
أصيله: سمعيني للأخير بعدين قرري براحتك.
وبدءت تكلمها والممرضه متفاجأه بالكلام اللي تسمعه من أصيله.
غرفة مزن وحياه
تدخل مزن الغرفه تفتح لابت توبها بعدين جلست تلتفت يمين يسار وقالت بين نفسها : وين حياه طول اليوم ما شفتها لا بالجامعه ولا بالبيت وين مختفيه.
غرفة مصعب الطبيه
الممرضه صرخت بدون احساس : لا مستحيل اللي اطلبيه مني أم نايف.
أصيله: خفضي صوتك عن حد يسمعنا فكري زين بالعرض اللي كلمتك فيه راح تحصلي مبلغ محترم يعدل وضعك ووضع اهلك كلهم
الممرضه: لا بس هذا صعب وحرام اللي تبيني اسويه اقتل نفس مستحيل.
أصيله : ماراح تقتيليه بس راح تفثلي عنه الاجهزه مع ابره بالمغذي وخلاص بيموت موتت ربنا.
الممرضه : لا لا
أصيله : فكري بالموضوع لاتقرري اللحينه شيك بقيمة ٥٠ الف ريال عماني راح يخليك بنعيم فكري بالموضوع بعدين رديلي خبر ها بس بيني وبينك الموضوع إذا حد عرف أنا راح انكر وراح اللبسك القضيه.
وتركتها وراحت وحلت الممرضه في شتات بين نفسها وضميرها.
يتبع….
