الكاتب :سمير الشحيمى
مصعب دخل بيته المساء وحصل الكل بالصاله جالسين
أصيله: هلا وغلا فيك مصعب نورت بيتك كنك تأخرت اليوم؟
مصعب هو يجلس : هلا بيج أصيله اليوم كان واايد شغل واتفاقيات جديده أسأل الله التيسير ها كيف تعشيتو ولا بعدكم؟
أصيله : لا والله نترياك.
نايف وحيدر وأزواجهم قاموا يسلمون على مصعب وتقبيل يده وراسه؛ مصعب قال: أصيله خبري الخدامه تجهز العشا.
أصيله: إن شاء الله
مصعب: نايف كيف كان دوامك اليوم؟
نايف: والله عمي الحمدلله في ضغط عمل تعرف لويت الأرقام والحسابات.
مصعب : بيض الوجه ولا تقصر بعملك خاصه أن مدير البنك من معارف عمك فارس.
نايف : ولايهمك عمي بكون عند حسن ظنك.
أصيله: خبرتك خليه يشتغل معاك ويمسك حسابات الشركة بس أنت ما رضيت.
مصعب: مع الوقت ويقوى عوده ويكسب خبره بجيبه عندي بالشركة؛ وأنت يا حيدر كيف العمل اليوم؟
حيدر : عمي مصعب كله الأمور تمام عال العال.
مصعب: كل توفيق يارب؛ وين البنات الصغار ماشوفهن؟
حياة من الطابق الثاني : نحن هنا.
مصعب يضحك : تعالي حبيبتي أبوك تعالي.
تنزل حياة وتسلم على أبوها مصعب وتقبل إيده؛ أصيله أطالعها بنظرات حقد وكره وقال لها :كيف كانت الجامعه اليوم؟
حياة: الحمدلله مره وناسه.
مصعب : تقولي وناسه شو هيه ملاهي ولا مكان دراسه؟
حياة تضحك: لا يا أبويه بس من كثر الدراسه فيها حلوه اقولك وناسه.
مصعب : زين زين؛ وين أختج مزن؟
حياة: مزن بالغرفه على اللاب توب.
مصعب : خليها تنزل بعدين عشان تتعشى معانا جميع أنا بقوم اصعد غرفتي ببدل ملابسي وبنزل لكم.
يصعد مصعب لغرفته؛ أصيله أطالع حياة وقالت:حياة قومي جهزي السفره مع الخدامه عشان تحرك إيدها شوي.
حياة: أنا بطلع فوق أنادي مزن وبننزل مع بعض.
أصيله تعصب: ماتسمعي كلام اللي أكبر منج يالله روحي المطبخ أنا بسير أنادي مزن.
حياة : لا حول ولا قوة أنزين سايره.
أصيله: راسها يابس هاي النتفه.
سندس : عمه خليها تحطي راسك براسها هاي بونها كذيه عنيده.
أصيله : ما أطيقها.
تماضر : مسكينه بنت طيبه حبوبه لو تعاملونها باللين تراها البنت أذهبه.
أصيله: كرميني بسكوتج قالت طيبه قالت.
تناول الجميع عشاهم من بعد وجبة العشاء كل واحد بغرفته.
غرفة حياة ومزن وكل وحده بسريرها حياة ماسكه كتاب تقرأ منه ومزن تسولف بتلفون مع صديقتها أفنان واللابتوب جدامها شغال تتسمع أغاني.
حياة تغلق الكتاب اللي بيدها وقالت: مزن ممكن تخفضي على الصوت أريد أنام.
مزن ماترد عليها مشغوله مع الأغاني أفنان؛ ردت كلمتها مره ثانيه : مزن مزن مزوون
مزن: ها شوفيج؟
حياة: أريد أنام قصري على الصوت.
مزن : ما أحب أسمع الأغاني بصوت واطي.
حياة : وبعدين يعني ما أنام باكر وراي محاضرات مهمه الصبح وأنتي ماعندج محاضرات الصبح كله محاضراتك الظهر
مزن: أنزين خلاص ها بركب سماعه انخمدي.
حياة :الله يصبرني.
وفي غرفة حيدر يتمدد بسريره وتماضر على الكمديون تعدل شعرها وترتب حالها قالت: تصدق حيدر أمك واايد حاطه دوبها بدوب حياة.
حيدر: أمي حاطه دوبها على الجميع.
تماضر: بس تعاملها مع حياة غير وااايد.
حيدر : لا تحاتيها حياه إذا في شي موجود عمي مصعب بيدافع عنها.
تماضر:الله يكون بعونه عمي مصعب يلاقيها بالشغل ولا من البيت.
وفي غرفة نايف توه طالع من المسبح وسندس تلعب بتلفونها قالت: نعيماً حبي.
نايف: الله ينعم عليج.
سندس :تعرف هنيه بالمواقع الأون لاين واايد حاجات حلوه من اكسسورات وملابس ومكياجات بأسعار تنافسيه.
نايف: اللي أعرفه حاليا أن غرفة النوم لراحه ورقاد من بعد عناء يوم طويل.
سندس : أكلمك صج وأنته تتمصخر.
نايف يتمدد بالسرير : والله أريد أرتاح ليش اتمصخر.
سندس: إنزين خبرني شو قررت؟
نايف : في شو؟
سندس : بالخاتم اللي أبي أشتريه.
نايف: خبرتك مب وقته.
سندس : أنت ليش كذيه تحب تعكر مزاجي وترد اي شي أطلبه منك؟
نايف: سيوله ماعندي خبرتك الف مره سيوله ماعندي
سندس : اوف منك مامنك فايده. وصكرت ليت الأباجوره.
في غرفة مصعب متمدد على سريره يقلب ملف بيده فيه أوراق وأصيله على الكميديون تمسح المكياج اللي بوجهها وتعدل شعر راسها وقالت: مصعب الغالي بسك حتى الشغل جايبه عندك لسريرك؟
مصعب : الشغل مايعرف الشركة أو البيت.
أصيله: بس أنت تعرف إذا هو مايعرف.
مصعب يضحك : كلامك صحيح وهذا الملف حطيته على الطاوله وهاي النظاره جنب الملف اللحين لازم انام وأرتاح.
أصيله : فيك نوم أريد اسولف معاك شوي.
مصعب:كان ودي بس باكر أقوم بدري بسير الشركة وبوصل معاي حياة للجامعه لأن عندها محاضرات الصبح
أصيله : يا حظي وبخت أهلي فيني خلاص نام أحلام سعيدة
مصعب: باكر بنتفاهم تصبحي على خير أم نايف.
يتبع…
