الشاعر: أحمد عبد الحق
لما تيجي سيرة أبوك … يتخلع قلبك بين ضلوعك
تصحي مشاعرك كلها … تخبط عليك تفتحلها
حاول تلحق دموعك …هو مين اللي ده
اللي هيترص فيه الكلام … هو أي حد
ولا أي حد ..ده الأب الإلهي
اللي شايل منه كل حاجه … مش أسم وجد والسلام
مش مجرد أسم عادي …حد عادي
من صلب ضهره … نسخوا منه كام غلام
أمتداد من اللي عدي …النخاع اللي في أبوه
يجي وقت …ويعدي وقت
لما يتمخطر ويتغندر …يسألوا ده مين ابوه
ماهما لو حسينا اللي بينا…الأولى كان جدي من زمان
حسوا بيه وأستجوبوه ….لولا حنية قسوتك
ماكنت جيت …لولا الحماية والعنايه
لولا حمايتي بقوتك … أنا ماشي بحكمتك
يابويا والله… وحشتني حنيتك
لما تيجي سيرة أبوك …تقوم تصلي ركعتين
تحسه قوام بين ضلوعك ….تنزل جواك دمعتين
لما تيجي سيرة أبوك ….والله يحتار الكلام
إزاي أقول أحساسي بيك …إزاي يقدر بوصفك
حبة كلام….وحشني يابويا وأنت غايب
بيروح مني كل الكلام…..هو أنا حتة منك
ولا أنت حتة مني …حتة منك ..حتة مني
أوعي تزعل يابا مني …لما أشتاقلك بحس إني
تنزل دمعة غصب عني …دمعة إجلال وإحترام
