المهدي تركي الرياحي
ياضميري مشترين الضماير ماشروك
ماتغير لو تغير طبع كل الآنام
مخلفين الناس عن طيبهم ماغيروك
ولو تحس إنك تغيرت عينك ماتنام
ما يحبك فالبشر مثل حب أمك وأبوك
لو فرشلك من يصيد الفرص ريش النعام
ولو تنازل عن مباديك صفوا لك وجوك
صف متاخر وصفين عندك بالامام
لا يهمك لو يمرونك و ما عبروك
أنت فوق إدراكهم لا تلحقهم ملام
سيرتك معروفه ومثبته مثل الصكوك
وفوق منكبك النياشين وأكثر من وسام
لا تحرا عالم ٍ في دجى ليلاً دكوك
مثلهم مثل العمى مايشوف إلا الظلام
لو جمعت الفين منهم صديقٍ ما نفعوك
أصدقاء ذا الوقت ماعندهم غير الكلام
ولو تعلق لك عباية على إحدى الشبوك
أمتلت ساحاتها من مجاريح الغرام
من مزورة العواطف مصبغّة السلوك
الهيام اللي مداهيلها واد الهيام
شفتهم في كل سوق ومقاهيها بروك
الحنان يدورونه ولو دربه حرام
ذا سببهم ياضميري وإلا حولك شكوك
لا غرابة يوم في الذايقة صار أنفصام
