المهدي تركي الرياحي
ما أنا بنعلم ياصديقي عن الغيب
نفوس البشر مثل الطيور وعلقها
من كثر ما خذنا دروس وتجاريب
نترك جميع الناس للي خلقها
أحد نمشي صحبته بالأساليب
واحدٍ نحطه فالعيون وحدقها
واحدٍ نجنب عند طاريه تجنيب
علومه اليا جابها قلت سقها
صاحب رفيع النفس لماح وأديب
ماقال لأجلك كلمة ما صدقها
وأبعد عن اللي يبلشك بالمطاليب
هذاك لو أكلاك تسرق سرقها
الصحبة اللي ما هدفها على الطيب
عشبة نفودٍ ما يطوّل دبقها
أما ذبحها برد وإلا لواهيب
وإلا العجاج أن هب فيها محقها
وصحبتك مع كفوٍ يعرف المواجيب
تصير شجرة تستظل بشنقها
قرمٍ يجي في طيب ويغيب في طيب
وعلومه اليا قالها ما درقها
دايم معك موجود والماقف اصعيب
والطالة اللي ترفع أسمك عشقها
هذا ترى والله حصان الاطاليب
ربي خلق كل الرجال وفرقها
هذاه هو من ينطق الحق لاهيب
وبنادقٍ ترميه يخطي فشقها
مهوب من دايم يحش العراقيب
والكلمة اللي صايبة ما نطقها
جعله عقيم ما يجي خلفه الصيب
شجرة رداء ماعاد ينمو ورقها
