الكاتب :سمير الشحيمى
بيت أم عدنان
ميثه وأم عدنان يشربن القهوه ثم قالت أم عدنان: خير أم مزنه أشوفك مهمومه؟
ميثه : متضايقه من جلسة البيت وقلت أجي أغير جو معاك.
أم عدنان: حياك بأي وقت حبيبتي.
ميثه : ما تقصرين الغاليه.
الخدامة تضع صينية الحلويات على الطاوله وتغادر تتناول أم عدنان قطعه وتعطيها لسلامه وهيه تقول: حلي بقطعة الكنافة هاي ومع فنجان القهوة من إيدي وراح يعدل مزاجك وخبريني شو فيك؟
ميثه تتناول القطعه وقالت: مافي شي غير أمور هاي الدنيا والاعيال.
أم عدنان: مشاكل الاعيال وهمهم مايخلص من صغرهم نحن نحاتيهم انقول بيكبرون وبنفتك من همهم يكبرون ربي يحفظهم ويزيد همهم.
ميثه : هاي سنة الحياه وأنا أختك.
أم عدنان: هيه والله، كيف بناتك مزنه روضه شو أخبارهن؟
ميثه: روضه زينه وماباقي شي عن تولد ومزنه زينه لله الحمد محد غيرها كاسره ظهري.
أم عدنان: ليش سلامات؟
ميثه: شو أقولك يا أم عدنان؟
أم عدنان: اللي بخاطرك .
ميثه تتنهد : عمها خميس يبي يزوجها حق واحد من أعياله وهيه رافضه.
أم عدنان: مزنه خبرتك؟
ميثه :لا هيه ماتتكلم ماتبي تغثني.
أم عدنان: عيل من خبرك؟
ميثه : اتصلت فيني موزة وخبرتني السالفه.
حالة صمت تعم المكان.
الكافيه
بطي يحدث أخيه إبراهيم: واللحين زوجتي ميسم مسويه لي سالفه طويله عريضه بخصوص هالموضوع.
إبراهيم : أبوي ماعرف على شو ناوي وطلع لنا بهاي السالفه.
بطي : أنت عارف عناد أبوي إذا يبي شي بيسويه.
إبراهيم : والحل؟
بطي : إنك تغير رايك وتوافق إنك تتزوج مزنه.
إبراهيم: شو تقول ! أنته مستحيل أسويها وتخلى عن شمايل.
بطي : عيل تبي بيتي يخرب بسبتك أنت ومزنه وأتطلق من حرمتي ميسم أنا أحبها ومالي حد غيرها.
إبراهيم: الموضوع بينحل بس خلينا نفكر شو انسوي بدل مانتضارب.
بيت أهل ميسم أمها تقول لها : إذا سواها بطي وتزوج عليك تطلقي وتعالي عيشي فبيت أهلك ما عيزانين عنك ولا عن أعيالك.
أبو ميسم : ياحرمه لا تجلسي تقري فوق راس البنت كنك بليس لا تخربي بيتها.
أم ميسم : أنا اكلمها عشان مصلحتها شو عرفك أنت.
أبو ميسم : اسمعيني يا بنتي الحرمه مالها غير بيت زوجها لا تضحك عليك أمك.
ميسم تنهدت وقالت : كلام أمي صح وأنا خبرته بطي إذا صار وتزوج علي بترك البيت أنا والاعيال.
أبو ميسم: راجعي نفسك يا بنتي راح تندمين بعدين.
ميسم: أبويه أنا متحمل أشوف بطي مع حرمه ثانيه غيري بس أنه أفكر بالموضوع أحس بصداع وصدري يضيق علي.
أبو ميسم : تعتقدين الطلاق هو الحل غلطانه عمره الغلط ما يتصلح بالغلط.
ميسم : بس شو الحل يا أبويه والله بيصير شي فيني إذا سواها بطي وسمع كلام أبوه وتزوج علي.
أبو ميسم: بروحك قلتيها أبوه اللي يبيه يتزوج مب هو من شور راسه تعوذي من بليس ولازم تعاوني زوجك عشان يحصل على حل بدل ماتزيدي همه بهم ثاني.
أم ميسم : سمعي يا ميسم كلام أبوك وايد منه ولا تصيري طيبه بتكوني أنتي الخسرانه.
ميسم تمسك رأسها وتقول : ماعرف ماقادره أفكر.
أبو ميسم: قومي توضي وصلي ركعتين وربي بيهدي سرك.
مساءً منزل مزنه
تنتهي من تناول وجبة العشاء مع ابنتها غيداء ثم قالت : غيوده قومي غسلي إيدك وبدلي ملابسك عشان بنسير أنام.
غيداء: باكر إجازة خلينى نسهر اليوم.
مزنه : ماينفع حبيبتي باكر جدك خميس يبينى نسير نقضي الإجازة بالشاليه اللي اشتراه من فترة.
غيداء : صج والله بنسير الشاليه وناسه صار معانا شاليه.
مزنه: هيه صار مع بيت جدك شاليه وباكر كلنا بنسير نجلس لنا يومين هناك.
غيداء: عيل بقوم أرتب ملابسي وانام.
صعدت غيداء إلى غرفتها وتنظر لها مزنه وهيه تبتسم وفجأة رن هاتفها مكالمة هاتفيه من منزل أمها فردت على المكالمه : الو …. والله بأي مستشفى…اللحين بجيكم مسافة الطريق…. لا مقدر اتريا اللحين بجيكم باي.
نهضت بسرعه من مكانها ونادت على الخدامه وطلبت منها البقاء بالقرب من ابنتها غيداء وأحكام اقفال أبواب المنزل ثم غادرت.
يتبع….
