كلمات / المهدي تركي الرياحي
السعودية – جدة
بعض المجالس ما غير أناظر الساعة
وأطالع الوقت في اللي راح والباقي
نفسي من الكذب والتأليف جزاعه
واليا سمعت الغلط والدجل ما أطاقِ
وأكره ختولٍ تقوده نفس دناعه
دايم عيونه تدًوُر وين الأرواقِ
وأعرف هدف ضحكةٍ صفراء وخداعة
لو كان تنفخ زغود وتملى الأشداقِ
هي عملة الضايع اللي جعله الضاعة
خبلٍ مثل عشبةٍ تنبت بالأنفاقِ
وابعد عن اللي يشيل الكبر بأنواعه
يشوف ما فوقه أحدٍ جعله يعاقِ
يا النذل منيب للأنذال شماعة
اللي تجي لثياب السود معلاقِ
الطيب معروف رواده وصناعه
اللي ثناء الناس فيهم وصل الأفاقِ
كلاً يحسب العرب ما تعرف أوضاعه
والناس تدري عن اللي تخفي الأطباقِ
طاري حداهم يغث القلب بأوجاعه
واسمه خبيث تعوذ منه الأوراق
يفدون من هو يفيد الطيب بذراعه
الوافي اللي لدرب العز سباقِ
سري وسره نحفظه كأنه وداعه
مهيب من حظ نمام وبواقي
وعلومنا ما تبث بكل سماعه
وإلا جابها واحدٍ حسه ترقراقِ
أطباعي أحسها نسخة من أطباعه
لا أبطي له أشتاق وليا أبطيت يشتاقِ
