سمير الشحيمي
*كن ذليلا لربك ثم لوالديك ثم نقطة انتهى*
القصر
صباح اليوم التالي يخرج السيد سفيان ومعه محمود كعادته ينطلق بموكبه لتفقد المزرعه وأقسامها وكيفية سير العمل بالحضائر والمزارع المحيطة داخل مزرعة قرت العين.
السيدة روعه تجلس على طاولة الطعام وتخدمها وسن وبقية الخادمات.
روعه : وسن وين مياسه للحين نايمه؟
وسن : الأميرة راح تكون بعد شوي متواجده معاك على سفرة الطعام.
تنزل مياسه وهيه تدندن حتى جلست على طاولة الطعام قائله : صباحو ماماتي كيفك؟
روعه بغضب : شكله بنجلس نعلم على كبر يا مياسه؟
مياسه : خير شو فيه ماماتي؟
تقترب وسن من مياسه وتهمس لها بأذنها فبتسمت مياسه ثم نهضت قائله : صباح الشوق والغلا والجمال يا أحلى أم.
تقترب من روعه وتقبل رأسها ثم قالت روعه : اللحين عرفتي شو فيه اللحين.
مياسه ترجع لمكانها : آسفه مامي نسيت.
روعه : نسيتي ها كم مره قايله لك تصبحي وتمسي علي وعلى أبوك وحتى لما نسير مع جدك وجدتك تبوسي ايدهم وراسهم معلمتنك أكثر من مره.
مياسه : أنتي دوم مكبره المواضيع باباتي ما يسوي نفس انتي ماتسوي وتعاتبي.
روعه : السنع والأدب واحترام الكبار هاي من أهم الأمور معاي لازم تحطي هالشي ببالك إذا أبوك ما حاسبك أنا بحاسبك لأن تربيتك ولازم أعرفك الصح من الغلط هالشي مسؤوليتي.
مياسه وهيه تتناول وجبتها : ليش مسؤوليتك يا حلوة اللبن.
روعه : لأن أنا أم وهالشي بتعرفيه لما تتزوجي ويكون معاك أعيال.
مياسه : حبيبتي خلاص مره ثانيه ماراح أنسى اهم شي ما تزعلي يا قمر أنتي.
ابتسمت روعه من كلام مياسه وهيه تقول : اخ منك ومن اللسانك.
مياسه : أيوه هالويه ما يحلى عليه غير الابتسامه تطلعين قمر وربي.
ابتسمت وسن فقالت روعه : كلي أكلك عوافي.
تنظر مياسه لساعتها ثم نهضت مسرعه وهيه تضع لقمة كبيره بفمها من الصمون وهيه تقول : تأخرت بسير الاسطبل بطلع بجولة بالحصان.
روعه : أنزين أكلي بعدين سيري في وقت.
مياسه وهيه تمشي مسرعه لخارج القصر : مقدر تأخرت يالله نلتقي على الغدا بحبك.
نظرت روعه لوسن وهيه تبادلها ابتسامه كبيرة.
المزرعة
يقف موكب السيد سفيان أمام بساتين الفواكه والنخيل والخضروات وهو يتحدث مع العمال بغضب : سمعوني أنا من كثر ما تكلمت ماراح اتكلم زيادة أحاول أكون زين معاكم لكن اهمالكم يزيد أكثر وأكثر يا محمود سجل خصم لكل واحد فيهم 20 بالميه من رواتبهم عشان يعرفون إن أي خساره تصير لي هم يتحملونها.
محمود يمسك بدفتره وينظر إلى العمال بشفقه ثم تحدث أكبرهم سنا : سيد سفيان أرجوك لا تخصم علينا عدنا بيت والتزامات كثيره مستعد اشتغل ليل نهار بس لا تخصم من راتبي.
سفيان : خلاص الكلام انتهى الخصم راح يصير عشان ما تكررون هالشي مره ثانيه.
يقترب الرجل كبير السن من السيد سفيان وأمسك بيده ليقبلها ويترجاه لكن السيد سفيان سحب يده بقوه من يد الرجل كبير السن الذي عاد يمسك بيد سفيان مره أخرى لينال استعطافه لكن هذه المره السيد سفيان دفعه و أوقعه على الأرض وهو يقول بغضب : شو هاي الحركات المزطه ماغصب تبوس يدي.
سحب سفيان كرباج من خصره وانهال ضرب على الرجل الكبير السن وبقية العمال ينظرون وقفز محمود يحمي جسد الرجل كبير السن وتلقى هو الضربات بدل عنه فتوقف سفيان وهو يقول بغضب : شو هاللي تسويه يا محمود أنت جنيت و لا شو سالفتك.
أفلح : سيد سفيان السموحه منك بس الرجال كبير سن ما يتحمل ضرب ما كذيه تنحل الأمور.
سفيان : بعدك جاي تعلمني شغلي يا محمود وكيف اتعامل مع عمالي.
محمود : حشى لله سيد سفيان بس ما يتحمل ضرب مثل ماخبرتك بحكم سنه.
نظر السيد سفيان إلى محمود بغضب ثم رمى الكرباج على أحد حراسه وهو يقول : سجل عليهم خصم مثل ماخبرتك 20 بالميه وأنت بعد سجل خصم من راتبك 30 بالميه عشان هاي الحركه اللي سويتها جدامي مخلي نفسك فندام زمانك.
فخرج السيد سفيان وركب عربته وانطلق مبتعدا ونهض محمود وساعد الرجل كبير السن على النهوض فسأله : جاك شي يا عمي يعورك شي؟
الرجل وهو يتكئ على الجدار : من كثر التعب والذل ما أحس بشي أجسادنا ميته من كثر الشغل بس نبي لقمة العيش اللي نوكل فيها انفسنا واعيالنا بس ما نبي شي ثاني.
محمود : خلها على الله يا عمي أهم شي صحتك وعافيتك.
الرجل : سويتلك مشكله مع السيد سفيان وأنت ماناقص مشاكل معاه.
محمود : ولا يهمك ياعمي الحال واحد وتعودت خلاص محد مرتاح ولكن نقول الحمد لله على كل حال.
الرجل كبير السن يرفع يده مناجيا الله سبحانه : اللهم لك الحمد والشكر دائماً وابدا.
الإسطبل
تقف مياسه وتنادي : ياعم يا عم.
يخرج أبو وسن مسؤول الإسطبلو: الأميرة الصغيرة نورتي المكان.
مياسه : بنورك يا عم أريدك تجهزلي فرسي مهره لو تسمح.
صوت من خلفها (ما شاء الله اسم فرسك مهره زين زين) تلتفت مياسه إلى مصدر الصوت كان عمرو يقف بشكله الوسيم وعضلاته البسيطة المتناسقة أعطته مظهر كعارضي الأزياء وهو يرتدي بنطال وقميص رياضي ضاغط على هيكل جسده الرياضي النحيل.
مياسه تنظر إليه بإعجاب قائله : عمرو وصلت ما شاء الله أيوه اسمها مهره عندك مانع؟
عمرو : لا حشى ما عندي مانع بالعكس الفرس على فارستها جميله واسمها جميل بعد.
مياسه بخجل : من ذوقك وين محمد ما جى معاك؟
عمرو : ما رضى سار مع أبوه الشغل.
مياسه : مستعد نطلع جولة بالخيول؟
عمرو : أكيد مستعد ولا ليش أنا جاي هنيه.
مياسه : عمي بس لو تسمح جهز اي حصان يكون زين ومدرب حق عمرو لأنه بيطلع معاي.
أبو وسن وهو ينظر إلى عمرو ثم قال : بس يا أميرة مياسه السيد سفيان عنده خبر؟
مياسه : عمي مالازم يكون معاه خبر جهز الحصان لعمرو بسرعه.
ابو وسن : بس يا أميرة السيد….. قاطعته مياسه : عمي لو تسمح خلاص جهز الاحصنه ننتظرك.
أبو وسن يصمت قليلاً ثم قال : على أمرك يا أميرة مياسه دقايق بس.
ذهب أبو وسن ليجهز الأحصنه فقال عمرو : ماريد اسببلك إحراج مع أبوك.
مياسه : ماعليه لا تحاتي الكل يحسب حساب لأبوي بس أبوي انسان طيب ومايرد لي طلب.
عمرو : أكيد أنتي الأميرة الصغيرة.
ابتسمت مياسه من كلام عمرو وماهيه إلا دقائق وأتت الأحصنه واعتلوها وانطلقى في ربوع المزرعه.
يتبع…
