محمد جمعان الدوسري
قعدت أقلب في ظروفي وحنيت……………
لذاك الزمان اللي رحل بالطفوله
للبيت والديره والسوق واوحيت…………..
وبل(ن)من الذكرى تسابق هطوله
اللي لها صوله تجيني بتوقيت………….
تنحر حزوني والشجون مغلوله
تحمل معاها من النسايم سباريت…………..
فيهاانين اللي يدمدم أطبوله
وين النفوس اللي تلاقيك لاجيت……….
لمراحهم بالود وادور حوله ؟؟
يوم المراجل تسبقك لاتمنيت………..
محد(ن)اذاجيته يغثك فضوله
من الوله يشرق محبه لونيت……………
ويمسح دموع اللي يشادي حموله
نعم الخوي اللي يشاكيك ل جيت……..
محتاج له جاتك تجامح خيوله
ما يسالك وش فيك لكن يباديت……
بأبشر وتتسابق مخايل سيوله
بابه مشرع بالوفا فارع الصيت……….
مايصد وله مع مدة الجود طوله
مايعاتبك ما يوبخك لا تلويت……
ومايحقرك ويغثك بسوء قوله
وما يوجعك ويخلط الماء مع الزيت…………
تبرى جروحك كلما شفت زوله
صدق بوله يضوي اذا جيت للبيت…………
يحسسك بالانس لارخى سدوله
شي(ن)لفاني طارفه ثم ونيت………….
ون العليل اللي سقط عن ذلوله
