المهدي تركي الرياحي جدة . السعودية
إذا غطى الليل في وجهه بقايا النهار
وأمر جيوشه تغطي سكة العابرين
مازالت أثار أمم يبني عليها الغبار
ومعالمٍ ما محتها التعرية و السنين
في الصورة اللي مخلدها الزمن بأختصار
صفحاتها مشرقة موجودٍ كل حين
ياليت نقدر نقدم للزمان إعتذار
يحفظ بقايا خجلنا كأننا مستحين
حنا غنيين لكنه غنى الافتقار
متسؤلينٍ ونملك كل كنزٍ ثمين
وياليت من رد للموات بعض اعتبار
إن كل الأمجاد منهوبه من العابثين
وإنا انفصلنا عن الماضي كبار وصغار
وعن كل عاداتنا واطباعنا مغيبين
يالهاجس الحر خذ بين الكواكب مدار
وسلم على أهل الوفاء لوكان هم ميتين
سلم على من يقدم للضيوف الفقار
بوقتٍ هل الجود من شح الزمن معسرين
وسلم على من نهار الضيق فك الحصار
ذاك الشجاع الذي قلبه حجر مايلين
وسلم على اللي ملا وجهه خشوع ووقار
العابد اللي عطاه الله صبر و يقين
وسلم على اللي رسم للشعر نهج ومسار
وخلى المجالس يعطرها الكلام الثمين
ثم قل حصل بعدكم شئً من الأنهيار
منما حصل للأدب من طرح مستشعرين
أستغفر الله كلش عندنا بأ نحدار
ماعاد نعرف غلطنا وين والصح وين
الذايقة تنتحب من عقب موت الكبار
وكل الأدب صار مستنسخ و شكله هجين
ياليت من شب في رؤس المراقيب نار
نارٍ وهجها على بعد المسافه يبين
تكون لطيّب مشكاةٍ من الاندثار
يبين من نورها الغث ويبين السمين
