محمد جمعان الدوسري
باقوم أراجع كل أوراقي اللي
جمعتها أول من فلول المواقف
أبي أرتبها وأعدل وأشلي
اللي يغث القلب من كل طارف
وأشوف خل(ن)لانخيته يهلي
ويقول أبشر وللمعالي مشارف
يشرق وفا وانصاه بالود كلي
راعي كرم من روضة الود قاطف
مايعتذر مايلتوى مايزلي
كله حنان ولصادق المد غارف
همال وبل الجود من وين حلي
يسقي المحول الجدب للخير حايف
وإذا لقيته جيته أركض وأهلي
به واتحفا وأنا بالأمثال عارف
أجيه في شوق(ن)وأنا مسفهلي
وأذكر جميله عند كل المعارف
وأشكر وداده وأذكره ما اخلي
ذكره وشكره وراعي الجود وارف
راعي الجمايل وين ماراح ياللي
تبي الجمايل ف قمة الطيب نايف
