المهدي تركي الرياحي
اذا غطاء الليل شئً من بقايا النهار
وارخى سدوله وغطى سكة العابرين
بين الرصيف القديم وبين ذاك الجدار
آثار موجودةٍ على غبار السنين
عنوان قصة مخلدها الزمن بأختصار
صفحاتها مشرقة في كل وقتٍ وحين
ياليت نقدر نقدم للزمان اعتذار
يحفظ بقايا خجلنا وإننا مستحين
حنا سوى والفقير اللي يحب افتقار
شخصأً تسوّلْ وهو لديه كنزٍ ثمين
ياليت من رد للموات بعض اعتبار
ان ما ورثناه منهم صار به عابثين
وإنا انفصلنا عن الماضي كبار وصغار
عن كل عاداتنا وامجادنا مغيبين
يالهاجس الحر خذ بين الكواكب مدار
وسلم على اهل الوفاء لو كان هم ميتين
سلم على من يقدم للضيوف الفقار
بوقتٍ هل الجود من شح الزمن معسرين
وسلم على من نهار الضيق فك الحصار
عزمه وقلبه حديدٍ قاسياً مايلين
وسلم على اللي ملى وجهه خشوع ووقار
العابد اللي عطاه الله صبر و يقين
وسلم على اللي رسم للشعر نهج ومسار
وخلى المجالس يعطرها الكلام الثمين
ثم قل حصل بعدكم شئً من الانهيار
من شعر من نثر من شعار مستشعرين
استغفر الله كلش عندنا بأ نحدار
ماعاد نعرف غلطنا وين والصح وين
الذايقة تنتحب من عقب موت الكبار
وكل الأدب صار مستنسخ و شكله هجين
ياليت من شب في رؤس المراقيب نار
نارٍ وهجها على بعد المسافه يبين
تكون للطيب مشكاةٍ من الاندثار
يبين في نورها الغث ويبين السمين
