الشاعر محمد عبد العزيز
عارفه أصعب حاجه إيه
إننا نحلم بحاجه
نلقى أحلامنا كابوس
إننا نبني في خيالنا
حاجه حلوه للنفوس
بس يا خسارة ساعتها
نكتشف كل اللي فات
نفتكر يوم ما اتقابلنا
إننا حكينا حكايات
اننا ضحكنا بحقيقي
بس كل الضحك مات
أصبح الحلم اللي بينا
قصة وهم وذكريات
بس فجأه قلت لأ
مش هسلم أو هبيع
بعد كل خريف مسيرنا
راح نعيش تاني الربيع
والغريب بكرا يعود
تملى أيامنا الورود
نمسح الدمع اللي عشش
نهزم الخوف م الوجود
عارفه أجمل حاجه إيه
اننا نعرف طريقنا
إننا نلاقي الأمان
إننا الحزن يفارقنا
يرجع الفرح اللي كان
إننا نكون من جديد
قلب واحد ليه روحين
بس خايف ألقى نفسي
رغم حلمي مش سعيد
خايف ألقى إن حلمي
حلم صعب بعيد بعيد
ألقى موج الدنيا عالي
موج بيكسر موج شديد
بس رغم كل ده
هبقى أقوى م الصعاب
مهما حاولوا يوقعوني
بكرا يرجع حلم غاب
والأمل من تاني يحيا
راح يدق كل باب
